Mapya yaibuka kifo cha Gene Hackman, mkewe
Familia yaiomba mahakama kuzuia taarifa za uchunguzi
NEW YORK: MWAKILISHI wa mali za muigizaji Gene Hackman ameweka pingamizi mahakamani kuzuia kutolewa hadharani kwa ripoti za uchunguzi wa kifo cha Gene na mkewe.
Mwakilishi huyo amesema anaweka pingamizi hilo kwa ripoti za uchunguzi uliofanywa haswa picha na video za kamera za polisi zinazohusiana na vifo vya karibuni vya Hackman na mkewe Betsy Arakawa baada ya miili yao iliyoharibiwa kwa kiasi kugunduliwa nyumbani kwao New Mexico mwezi uliopita.
Mamlaka ya New Mexico wiki iliyopita ilitangaza kwamba Hackman alifariki akiwa na umri wa miaka 95 kutokana na ugonjwa wa moyo na matatizo ya ugonjwa wa Alzheimer kama vile wiki moja baada ya ugonjwa nadra, unaoenezwa na panya ‘hantavirus pulmonary syndrome’ kuchukua maisha ya mke wake mwenye umri wa miaka 65.
Miili ya wanandoa hao haikugunduliwa hadi Februari 26, 2025 wakati wafanyikazi wa matengenezo na usalama walipofika kwenye nyumba ya Santa Fe na kuwaarifu polisi kuhusiana na miili hiyo.
Julia Peters, mwakilishi wa mali ya Hackman na Arakawa, alihimiza mahakama ya wilaya ya Santa Fe kufunga rekodi katika kesi hizo ili kulinda haki ya faragha ya familia katika malalamiko chini ya Marekebisho ya 14 ya Katiba ya Marekani akisisitiza uwezekano wa kutisha wa picha na video katika uchunguzi na uwezekano wa kusambazwa kwao na vyombo vya habari.
Ombi hilo, limeshawasilishwa mahakamani. Maisha ya wanandoa huko Santa Fe tangu kustaafu kwa Hackman. Mji mkuu wa jimbo unajulikana kama kimbilio la watu mashuhuri, wasanii na waandishi.
Sheria ya rekodi huria ya New Mexico inazuia ufikiaji wa umma kwa picha nyeti, ikiwa ni pamoja na picha za watu waliokufa, alisema Amanda Lavin, mkurugenzi wa sheria katika shirika lisilo la faida la New Mexico Foundation for Open Government.
Baadhi ya taarifa za matibabu pia hazizingatiwi kuwa rekodi ya umma chini ya Sheria ya Ukaguzi wa Rekodi za Umma.
Wakati huo huo, idadi kubwa ya uchunguzi wa vifo unaofanywa na watekelezaji wa sheria na ripoti za uchunguzi wa maiti na wachunguzi wa matibabu kwa kawaida huzingatiwa kuwa rekodi za umma chini ya sheria ya serikali kwa lengo la kuhakikisha uwazi na uwajibikaji wa serikali, alisema.
“Nadhani ingekiuka uwazi ikiwa mahakama ingepiga marufuku kutolewa kwa rekodi zote za uchunguzi, ikiwa ni pamoja na uchunguzi wa maiti,” Lavin alisema Alhamisi. “Wazo zima la rekodi hizo kupatikana ni kuhakikisha uwajibikaji katika jinsi uchunguzi huo unavyofanywa.”
