Antonelli bingwa Monaco Grand Prix, Lewis Hamilton nafasi ya pili

MONACO: MSHIRIKI wa mbio za magari Kimi Antonelli ameendelea kuandika historia kubwa katika msimu wa mashindano ya kimataifa ya mbio za magari (Formula 1) baada ya kushinda mbio za Monaco Grand Prix na kufikisha ushindi wake wa tano mfululizo msimu huu.

Mbio hizo zilikuwa za kusisimua na zenye changamoto kubwa za kukatizwa mara kadhaa kutokana na ajali mbalimbali, bendera nyekundu (red flag), na kusimamishwa kwa muda mrefu kutokana na uharibifu wa njia katika mzunguko maarufu wa Monaco.

Antonelli, ambaye alianza mbio akiwa katika nafasi nzuri ya uongozi, aliweza kudhibiti kasi yake na kushikilia uongozi wake licha ya shinikizo kubwa kutoka kwa wapinzani wake.

Baada ya kurejea kwa mbio kufuatia kusimama kwa muda, aliendelea kuonesha uimara na uzoefu mkubwa kuliko umri wake mdogo, akimaliza akiwa mshindi wa kwanza.

Katika nafasi ya pili alimaliza Lewis Hamilton, ambaye aliendelea kuonesha uimara wake kwa kumaliza karibu na Antonelli licha ya ushindani mkali.

Nafasi ya tatu ilichukuliwa na Isack Hadjar ambaye alionesha kasi nzuri katika mzunguko mgumu wa Monaco.

Mbio hizo ziliharibiwa na matukio kadhaa, ikiwemo ajali ya magari, changamoto za kiufundi, na kusimama kwa muda mrefu baada ya sehemu ya njia kuharibika kutokana na ajali kubwa iliyotokea katikati ya mashindano. Hali hiyo ililazimu waandaaji kusimamisha mbio kwa muda ili kufanya marekebisho ya usalama kabla ya kuendelea tena.

Pia, bingwa mtetezi Max Verstappen alilazimika kujitoa mapema baada ya kupata hitilafu ya injini ya gari lake, jambo lililomtoa nje ya ushindani mapema kabisa.

Kwa ushindi huu wa Monaco, Antonelli sasa anaonekana kuwa na kasi kubwa kuelekea kutwaa ubingwa wa dunia, huku wapinzani wake wakimtazama kwa makinis.