Ronaldo mbioni kustaafu soka
LONDON: NYOTA wa Ureno na Al-Nassr, Cristiano Ronaldo, ameonesha dalili za kutaka kustaafu soka, akisema mwaka ujao huenda ukawa wa mwisho kwake kucheza mchezo huo baada ya zaidi ya miaka 20 katika kiwango cha juu.
Ronaldo, mwenye umri wa miaka 41, amekuwa mmoja wa wachezaji bora na wenye mafanikio makubwa katika historia ya soka, akishinda mataji mbalimbali akiwa na Manchester United, Real Madrid, Juventus na sasa Al-Nassr.
Akizungumza katika mahojiano na jarida la Vogue yaliyochapishwa Jumapili, Ronaldo amesema: “Huenda huu ukawa mwaka wangu wa mwisho wa kucheza soka, na nataka kuacha urithi wa kuvutia.”
Mshambuliaji huyo amesema amefikisha mabao 976 katika ngazi ya klabu na timu ya taifa, huku akiwa bado anakaribia kufikia rekodi ya kipekee ya mabao 1,000 katika maisha yake ya soka.
Ronaldo, ambaye ni nahodha wa timu ya taifa ya Ureno na mshindi mara tano wa tuzo ya Ballon d’Or, amekuwa akicheza soka la ushindani tangu alipoanza soka la kulipwa akiwa Sporting Lisbon mwaka 2002.
Licha ya mafanikio yake makubwa, bado hajafanikiwa kushinda Kombe la Dunia, baada ya Ureno kutolewa katika hatua ya 16 bora ya michuano ya mwaka huu.
Hata hivyo, kabla ya kufunga safari yake ya soka, Ronaldo ataendelea kuitumikia Al-Nassr msimu huu wa Ligi Kuu Saudi Arabia huku akilenga kufikisha idadi ya mabao 1,000, ambayo itakuwa moja ya rekodi kubwa katika historia ya mchezo huo.
Baada ya kustaafu, Ronaldo amesema hataki maisha yake yaishie kwenye soka pekee, akieleza kuwa ana mipango mbalimbali ikiwamo kusafiri, kucheza padel na kufurahia matunda ya miaka yake 25 ya kujitolea katika soka.
