Ufaransa, England kupigania nafasi ya tatu Kombe la Dunia leo
Marekani: Ufaransa na England zitashuka dimbani Jumamosi mjini Miami, Marekani, kupambana kuwania nafasi ya tatu katika Kombe la Dunia 2026, huku kila timu ikisaka kumaliza mashindano hayo kwa heshima baada ya kushindwa kufuzu fainali.
Timu zote mbili ziliingia kwenye michuano hiyo zikiwa miongoni mwa vigogo waliotajwa kuwania ubingwa, lakini ndoto zao zilisitishwa katika hatua ya nusu fainali. Ufaransa ilifungwa mabao 2-0 na Hispania, wakati England ilipoteza kwa mabao 2-1 dhidi ya mabingwa watetezi Argentina licha ya kuanza kwa bao la mapema.
Mchezo huo utakuwa wa kipekee kwa kocha wa Ufaransa, Didier Deschamps, ambaye anatarajiwa kuiongoza Les Bleus kwa mara ya mwisho. Deschamps ameiongoza Ufaransa katika kipindi cha mafanikio makubwa ikiwemo kutwaa Kombe la Dunia mwaka 2018 na kumaliza nafasi ya pili mwaka 2022, hivyo atalenga kuhitimisha safari yake kwa kutwaa medali ya shaba.
Kwa upande wa England, kikosi cha Thomas Tuchel kimebaki na nafasi ya kumaliza katika moja ya mafanikio yake makubwa kwenye Kombe la Dunia baada ya kushindwa kufika fainali. Hata hivyo, rekodi haipo upande wa Three Lions kwani hawajawahi kushinda mechi ya kuwania nafasi ya tatu, wakifungwa na Italia mwaka 1990 na Ubelgiji mwaka 2018.
Historia ya karibuni pia inaipa faida Ufaransa katika mikutano dhidi ya England, ikiwemo ushindi wao wa robo fainali kwenye Kombe la Dunia 2022. Les Bleus pia wana rekodi nzuri katika mechi za kuwania nafasi ya tatu baada ya kutwaa medali ya shaba mwaka 1958 dhidi ya Ujerumani Magharibi na mwaka 1986 dhidi ya Ubelgiji.
Kuelekea mchezo huo, Ufaransa inaweza kumkosa beki William Saliba ambaye alipata majeraha ya mgongo katika mchezo dhidi ya Hispania, huku Maxence Lacroix akitajwa kuwa mbadala wake. England nayo ina wasiwasi kuhusu hali ya beki Reece James aliyepata majeraha ya misuli dhidi ya Argentina, wakati Jarell Quansah akitarajiwa kurejea kikosini baada ya kumaliza adhabu ya kusimamishwa.
Mechi hiyo inatarajiwa kuwa ya ushindani mkubwa huku kila timu ikisaka kumaliza kampeni yake ya Kombe la Dunia 2026 kwa ushindi na medali ya shaba, kabla ya kuelekeza nguvu katika maandalizi ya mashindano yajayo.
