Mama P. Diddy amtetea mwanae

NEW YORK: WAKATI mwanamuziki Sean ‘Diddy’ Combs mwenye miaka 54 akiwa gerezani huko New York akisubiri kufunguliwa mashtaka ya ulanguzi wa ngono na ulaghai, mama yake Janice Smalls Combs amejitokeza na kuhuzunishwa na mashtaka yanayomkabili mwanae.

Mama huyo wa Diddy amemtetea mwanae akiitaka mahakama kumpa nafasi mwanae ya kujitetea ili athibitishe kutokuwa na hatia.

Katika taarifa iliyotolewa na mama huyo kwenye New York Post, Janice alisema: “Inasikitisha kuona mwanangu akihukumiwa sio kwa ukweli, lakini kwa simulizi iliyoundwa na uwongo.

“Kutoa ushahidi kile kinachoonekana kuwa kama kupigwa risasi hadharani kwa mwanangu kabla hajapata fursa ya kuthibitisha kutokuwa na hatia ni uchungu ambao hauwezi kuvumilika kwa maneno.

“Kama binadamu, mwanangu anastahili kuwa na uhuru wake mahakamani, kushiriki na kuthibitisha kutokuwa na hatia.”

P. Diddy alikamatwa mwezi uliopita na amekana mashtaka ya kula njama ya ulaghai, ulanguzi wa ngono kwa nguvu, ulaghai au kulazimisha na usafirishaji kushiriki katika ukahaba.

Alinyimwa dhamana ya dola milioni 50 na atasalia gerezani hadi kesi yake itakaposikilizwa.

Baada ya kukamatwa kwa nyota huyo, wakili wake Marc Agnifilo alisema: “Diddy ni mtu asiyekamilika lakini si mhalifu.

“Kwa sifa yake, Diddy, tafadhali hifadhi uamuzi wako hadi upate ukweli wote. Haya ni matendo ya mtu asiye na hatia asiye na la kuficha na anatazamia kusafisha jina lake mahakamani.”

Tangu kufungwa jela, karibu wahasiriwa 120 wamewasilisha madai ya unyanyasaji wa kijinsia na nyota huyo anatarajiwa kukabiliwa na msururu wa kesi zinazoelezea madai ya kipindi hicho cha zaidi ya miaka 25.