Stevo Simple Boy ataka wazichape na X-wake
NAIROBI: MWANAMUZIKI maarufu wa Kenya, Stevo Simple Boy, ameibua mjadala mkubwa mitandaoni baada ya kutoa pendekezo lisilotarajiwa la kutaka kuzipiga na mpenzi wake wa zamani, Pritty Vishy, ili wamalize tofauti na migogoro ambayo imekuwa ikiendelea kati yao kwa muda mrefu.
Kauli hiyo ilitolewa wakati wa mahojiano yaliyosambazwa kwenye mitandao ya kijamii, ambapo msanii huyo alimtaka mtangazaji na mtayarishaji wa maudhui maarufu, Oga Obinna, kuandaa pambano rasmi la ndondi kati yake na Pritty Vishy. Kulingana na Stevo, pambano hilo lingekuwa njia bora ya kumaliza mvutano wa mara kwa mara ambao umekuwa ukiendelea hadharani kati yao tangu walipoachana.
Akiwa na msisitizo mkubwa, Stevo alisema kuwa amechoshwa na kile alichodai kuwa ni kauli na maoni hasi yanayotolewa dhidi yake na mpenzi wake huyo wa zamani. Alieleza kuwa badala ya kuendelea kujibizana kupitia vyombo vya habari na mitandao ya kijamii, angependa suala hilo limalizwe kwa njia ya moja kwa moja ndani ya ulingo wa ndondi.
“Akuje kwa ring tumalizane,” alisema Stevo, kauli ambayo ilizua hisia na maoni tofauti kutoka kwa mashabiki wake pamoja na watumiaji wa mitandao ya kijamii. Wengi walitafsiri maneno hayo kama ishara ya kutaka kufunga ukurasa wa ugomvi wao kwa njia ya kipekee, huku wengine wakiona ni kauli ya mzaha inayolenga kujitangaza kwa umma.
Mzozo kati ya Stevo Simple Boy na Pritty Vishy umekuwa ukivutia hisia za watu kwa miaka kadhaa. Tangu walipotangaza kuachana, wawili hao wamekuwa wakitajwa mara kwa mara kwenye vyombo vya habari kutokana na kauli mbalimbali wanazotoa kuhusu maisha yao ya zamani ya kimapenzi. Katika nyakati tofauti, kila mmoja amewahi kutoa maoni yanayoonekana kumlenga mwenzake, jambo ambalo limekuwa likizua mjadala miongoni mwa mashabiki wao.
Katika mahojiano hayo, Stevo alionekana kuamini kwamba pambano la ndondi lingeweza kuwa suluhisho la mwisho kwa tofauti zao. Ingawa hakutoa maelezo mengi kuhusu namna pambano hilo lingeandaliwa, alionyesha wazi kuwa angekuwa tayari kushiriki ikiwa mpango huo ungeandaliwa rasmi.
Hata hivyo, kauli ya Stevo imefanikiwa tena kumweka katikati ya mijadala ya mtandaoni, jambo ambalo limekuwa la kawaida kwa msanii huyo anayejulikana kwa matamshi yake ya moja kwa moja na mtindo wake wa kipekee wa kujieleza. Kwa sasa, bado haijajulikana iwapo Pritty Vishy atajibu ombi hilo au kama Obinna atachukua hatua yoyote ya kuandaa pambano hilo ambalo tayari limezua gumzo kubwa miongoni mwa mashabiki wa burudani nchini Kenya.
