Hispania yavuna fedha nyingi Kombe la Dunia

MAREKANI: Shirikisho la Soka Duniani (FIFA) limetenga jumla ya dola za Marekani milioni 871 (takribani trilioni 2.3 za Tanzania) kama fedha za zawadi kwa mataifa 48 yaliyoshiriki Kombe la Dunia 2026, kiasi kinachoweka rekodi mpya katika historia ya mashindano hayo.

Mashindano yaliyofanyika kwa mwezi mmoja nchini Marekani, Canada na Mexico yamekuwa si tu ya ushindani mkubwa, bali pia yenye faida kubwa kifedha kwa timu zilizoshiriki.

Mabingwa wapya wa dunia, Hispania, wameondoka na kitita cha dola milioni 51 baada ya kuibuka mabingwa kwa kuifunga Argentina bao 1-0 katika mchezo wa fainali.

Kiasi hicho ni kikubwa zaidi kuliko dola milioni 42 ambazo Argentina ilipokea ilipotwaa Kombe la Dunia la mwaka 2022 nchini Qatar.

Argentina, waliomaliza nafasi ya pili, wamejinyakulia dola milioni 34, huku timu nyingine zilizofika hatua mbalimbali za mashindano nazo zikipata mgao kulingana na mafanikio yao. Mfumo huo wa malipo umeongeza motisha kwa mataifa kushiriki na kufanya vizuri katika mashindano hayo makubwa zaidi ya soka duniani.

Mbali na fedha za ushindi, FIFA pia ilihakikisha hakuna timu inayoondoka mikono mitupu. Kila moja ya mataifa 48 yaliyoshiriki ilipokea dola milioni 12.5 kama malipo ya ushiriki, zikiwemo dola milioni 10 kwa kufuzu na kushiriki hatua ya makundi pamoja na dola milioni 2.5 za maandalizi, mazoezi na gharama nyingine kabla ya mashindano kuanza.

FIFA ilieleza kuwa malipo hayo ya maandalizi yaliongezwa ili kupunguza migogoro iliyokuwa ikijitokeza kati ya wachezaji na vyama vya soka vya nchi zao kuhusu bonasi za mashindano. Hatua hiyo pia ililenga kuhakikisha timu zote zinapata mazingira bora ya kujiandaa bila kujali uwezo wao wa kifedha.

Ongezeko la fedha za zawadi mwaka huu limechangiwa na uamuzi wa FIFA kuongeza zaidi ya dola milioni 100 kwenye bajeti ya mashindano, kufuatia maombi ya vyama kadhaa vya soka barani Ulaya vilivyotaka msaada wa kugharamia usafiri na malazi kutokana na mashindano kufanyika katika nchi tatu kwa mara ya kwanza katika historia ya Kombe la Dunia.

Kwa kiwango hicho cha fedha kilichotolewa, Kombe la Dunia 2026 limeweka rekodi mpya ya kuwa mashindano yenye zawadi kubwa zaidi kuwahi kutolewa na FIFA, jambo linaloonyesha ukuaji wa thamani ya soka duniani na kuendelea kuvutia mataifa mengi kushindania heshima pamoja na mafanikio ya kiuchumi.