Kenya Rugby Legends kuandika historia 2027
KENYA: TIMU ya Kenya Rugby Legends inajiandaa kuandika historia mwaka 2027 baada ya kuthibitishwa kwa mfululizo wa mechi mbili dhidi ya South Africa Rugby Legends katika mashindano ya SportPesa Legends Cup.
Mfululizo huo utaifanya michuano hiyo kuvuka mipaka ya Afrika Mashariki kwa mara ya kwanza tangu kuanzishwa kwake, huku Kenya ikitarajiwa kuikaribisha Afrika Kusini jijini Nairobi kabla ya kusafiri kwenda Cape Town kwa mchezo wa marudiano.
Mechi ya kwanza imepangwa kuchezwa Mei 8, 2027, jijini Nairobi, huku pambano la pili likitarajiwa kufanyika Julai 4, 2027, mjini Cape Town.
Timu ya Afrika Kusini inatarajiwa kujumuisha nyota wa zamani wa kimataifa, wakiwemo wachezaji waliowahi kushinda Kombe la Dunia la Raga na walioingizwa katika Ukumbi wa Umaarufu wa World Rugby.
Hali hiyo inatarajiwa kuongeza ushindani katika pambano hilo litakalowakutanisha baadhi ya wachezaji waliowahi kung’ara katika mchezo wa raga.
Nahodha wa Kenya Rugby Legends, Eddie Omondi, ameelezea furaha yake kuhusu hatua hiyo, akisema ni muhimu katika kukuza raga ya wachezaji veterani katika Afrika Mashariki na Kusini mwa Afrika.
Akizungumza na Citizen Digital, Omondi alisema mfululizo huo utatoa fursa kwa mashabiki kuwaona wachezaji mashuhuri wa zamani wakirejea uwanjani na kuendeleza urithi wao katika mchezo huo.
Alisema kuileta timu ya Afrika Kusini jijini Nairobi na baadaye kupeleka kikosi cha Kenya mjini Cape Town ni hatua kubwa katika kupanua wigo wa mashindano hayo na kuongeza idadi ya mashabiki wa raga ya veterani katika eneo hilo.
