Fifa yaahirisha fainali za FIFAe Saudi Arabia baada ya mashambulizi
JEDDAH, SAUDI ARABIA: SHIRIKISHO la Soka la Kimataifa (FIFA) kwa kushirikiana na Shirikisho la Michezo ya Kielektroniki la Saudi Arabia, limeahirisha fainali za mashindano ya FIFAe 2026 zilizokuwa zifanyike mjini Jeddah kuanzia Oktoba 16 hadi 25 mwaka huu, kufuatia mashambulizi ya hivi karibuni nchini Saudi Arabia.
Waandaaji wa mashindano hayo ya kimataifa ya michezo ya video wamesema uamuzi huo umefikiwa baada ya kutathmini hali ya usalama katika eneo hilo na athari zake kwa maandalizi na mipango ya kuendesha mashindano hayo.
Hatua hiyo imechukuliwa kufuatia shambulio lililoripotiwa katika uwanja wa ndege wa kimataifa wa Riyadh siku ya Jumamosi, lililosababisha vifo vya watu wasiopungua 12 na wengine zaidi ya 300 kujeruhiwa. Kundi la waasi la Houthi la Yemen, linaloungwa mkono na Iran, lilidai kuhusika na shambulio hilo.
Katika taarifa yao, waandaaji wamesema watatoa maelezo zaidi kuhusu tarehe mpya na mipango ya mashindano hayo baadaye.
Hali ya usalama nchini Saudi Arabia ilikuwa tayari imeathiri maandalizi ya mashindano hayo, baada ya timu za michezo ya kielektroniki za Japan na Brazil kujiondoa Jumamosi, kufuatia tathmini ya hali iliyopo nchini humo.
Kutokuwa na uhakika kuhusu usalama kumeibua wasiwasi kuhusu kuendelea kwa matukio mbalimbali ya michezo yaliyopangwa kufanyika nchini Saudi Arabia katika kipindi kijacho.
Mashindano ya tenisi ya maonesho ya Six Kings Slam yamehamishwa kutoka Oktoba hadi Desemba, huku Asian Tour ya gofu ikisema inaendelea kufuatilia hali ya usalama kabla ya mashindano ya Saudi International yaliyopangwa kufanyika Riyadh mwezi ujao.
Kwa upande mwingine, Shirikisho la Soka la Asia (AFC) limesema liko tayari kuzingatia kuahirisha Kombe la Mataifa ya Asia hadi mwaka 2028 ikiwa hali italazimu.
Mashindano hayo yamepangwa kuanza Januari 7, 2027, katika miji ya Riyadh, Jeddah na Al Khobar nchini Saudi Arabia.
Shirikisho la Soka la Korea Kusini (KFA) limethibitisha kuwa lina mawasiliano na AFC kuhusu hali inayoendelea nchini Saudi Arabia na kwamba linafuatilia kwa karibu maendeleo ya usalama.
Katika historia ya mashindano hayo, toleo lililopita liliahirishwa kwa mwaka mmoja baada ya China kujiondoa kuwa mwenyeji kutokana na vikwazo vya COVID-19, kabla Qatar haijachukua nafasi ya kuandaa mashindano hayo mwanzoni mwa mwaka 2024.
Kwa sasa, FIFA haijatangaza tarehe mpya za fainali za FIFAe 2026, huku wadau wa michezo wakiendelea kufuatilia hali ya usalama na athari zake kwa mashindano yaliyopangwa kufanyika Saudi Arabia.
