Giniki ashinda shaba ujerumani

MUNICH: MKIMBIAJI wa Tanzania, Emmanuel Giniki , amerejea kwa kishindo baada ya kukaa nje ya mashindano kwa miaka minne kutokana na majeraha, akishinda medali ya shaba katika mbio za Volksbank Münster Marathon nchini Ujerumani.

Giniki alimaliza mbio hizo kwa muda wa saa 2:12:37, akishika nafasi ya tatu katika mashindano yaliyokuwa na ushindani mkubwa wa kimataifa na hivyo kuiwakilisha Tanzania kwa mafanikio katika uwanja huo.

Mafanikio hayo yanakuwa muhimu zaidi kutokana na safari yake ya kurejea katika ushindani wa kiwango cha juu baada ya kipindi kirefu cha kukabiliana na majeraha yaliyomuweka nje kwa miaka minne.

Baada ya kurejea mazoezini na kwenye mashindano, Giniki ameonesha kuwa bado ana uwezo wa kushindana na wanariadha wa kiwango cha juu, huku muda wake wa saa 2:12:37 ukimpa nafasi ya kupanda jukwaani nchini Ujerumani.

Shirikisho la Riadha Tanzania (RT) limempongeza Giniki kwa mafanikio hayo, likieleza kuwa kurejea kwake baada ya miaka minne ya majeraha na kufanikiwa kushinda medali katika mashindano yenye ushindani mkubwa ni ishara ya uvumilivu, nguvu ya akili na kujituma.

Mafanikio hayo pia yanaipa Tanzania matumaini mapya katika mbio za masafa marefu, huku Giniki akionesha kuwa changamoto za majeraha hazikumzuia kurejea katika kiwango cha juu na kuipeperusha vyema bendera ya taifa nchini Ujerumani.