Rais wa CAF avunja ukimya kuhusu refa wa Somalia aliyezuiwa Kombe la Dunia
JOHANNESBURG: Rais wa Shirikisho la Soka Afrika (CAF), Patrice Motsepe, amezungumzia kwa mara ya kwanza sakata la refa wa Somalia, Omar Abdulkadir Artan, aliyezuiwa kushiriki Kombe la Dunia 2026 nchini Marekani licha ya kuwa na nyaraka halali za kusafiria.
Omar Artan alikuwa ameandika historia kwa kuteuliwa kuwa refa wa kwanza kutoka Somalia kuchezesha mechi za Kombe la Dunia. Hata hivyo, alizuiwa na maafisa wa uhamiaji katika Uwanja wa Ndege wa Kimataifa wa Miami mara baada ya kuwasili, ambapo mamlaka za Marekani zilieleza kuwa kulikuwa na masuala ya ukaguzi wa kiusalama (vetting concerns), bila kutoa maelezo ya kina.
Baadaye, Shirikisho la Soka Duniani (FIFA) lilithibitisha kuwa refa huyo hangeweza kushiriki mashindano hayo, likieleza kuwa nchi mwenyeji ndiyo yenye mamlaka ya mwisho kuhusu sera za uhamiaji na kuruhusu au kuzuia wageni kuingia ndani ya mipaka yake.
Hatua hiyo ilizua mjadala mkubwa duniani, huku viongozi wa soka Afrika na wadau mbalimbali wakieleza kuwa tukio hilo lilikuwa pigo kwa misingi ya haki na usawa katika michezo.
Akizungumza katika mkutano na waandishi wa habari nchini Afrika Kusini, Motsepe alisema aliguswa sana na kilichompata Omar Artan, akisema alikumbuka furaha kubwa aliyokuwa nayo refa huyo alipopokea taarifa za kuteuliwa kuchezesha Kombe la Dunia.
“Ilikuwa ni wakati wa fahari kwake, kwa familia yake na kwa bara zima la Afrika. Kilichotokea baadaye kilisikitisha wengi,” alisema Motsepe.
Hata hivyo, baada ya kukosa nafasi ya kuchezesha Kombe la Dunia, Omar Artan alipata faraja kubwa baada ya Shirikisho la Soka Ulaya (UEFA) kumteua kuchezesha mechi ya UEFA Super Cup 2026 kati ya mabingwa wa Ulaya Paris Saint-Germain na Aston Villa.
Uteuzi huo umeweka historia mpya, ukimfanya Omar Artan kuwa refa wa kwanza kutoka Afrika kuchezesha fainali kubwa ya klabu barani Ulaya.
Motsepe aliipongeza UEFA kwa hatua hiyo, akisema ilionesha imani kubwa kwa uwezo wa waamuzi wa Afrika na kumpa Artan nafasi ya kuonesha uwezo wake kwenye jukwaa la juu zaidi la soka la Ulaya.
Kuhusu uamuzi wa Marekani kumzuia refa huyo kuingia nchini, Motsepe alisema anatambua kuwa kila taifa lina haki ya kuweka sera zake za uhamiaji na kuamua nani anaruhusiwa kuvuka mipaka yake.
Hata hivyo, alisema tukio hilo limeibua mjadala muhimu kuhusu nafasi ya michezo katika kuunganisha mataifa na umuhimu wa kuhakikisha wale wanaostahili kwa uwezo wao wanapata fursa ya kushiriki kwenye majukwaa makubwa ya kimataifa bila vikwazo visivyoeleweka.
