Khaligraph apunguza kilo kutoka kilo 137 hadi 90

NAIROBI: Msanii maarufu wa muziki wa rap nchini Kenya, Khaligraph Jones, amefunguka kuhusu safari yake ya kupunguza uzito kwa zaidi ya kilo 47, akieleza kuwa nidhamu, mazoezi ya mara kwa mara na lishe bora ndivyo vilivyomwezesha kufikia mafanikio hayo makubwa.

Rapa huyo, ambaye jina lake halisi ni Brian Ouko Omollo, amesema alitoka kuwa na uzito wa kilo 137 hadi kufikia kilo 90 baada ya kubadili kabisa mtindo wake wa maisha. Safari hiyo imekuwa ikifuatiliwa na mashabiki kupitia kurasa zake za mitandao ya kijamii, ambapo amekuwa akishiriki maendeleo yake kwa kipindi cha zaidi ya mwaka mmoja.

Akizungumza kuhusu mafanikio hayo, Khaligraph alisema hakutumia njia za mkato bali aliamua kuwa na nidhamu ya hali ya juu katika kila jambo alilofanya.

“Nilitoka kilo 137 hadi kilo 90. Haikuwa rahisi, lakini nidhamu ndiyo iliyofanya tofauti,” alisema rapa huyo.

Khaligraph alieleza kuwa kwa sasa amejikita katika kula vyakula vyenye protini nyingi pamoja na mlo wenye uwiano mzuri wa virutubisho, huku akiepuka vyakula vilivyosindikwa na vile vyenye sukari nyingi.

Miongoni mwa vyakula anavyotumia mara kwa mara ni mayai, kuku, samaki, mboga za majani na matunda. Aidha, amesema hunywa maji kwa wingi kila siku na kupunguza matumizi ya vinywaji vyenye sukari.

Mbali na uchaguzi wa chakula, rapa huyo amesema udhibiti wa kiwango cha chakula alichokuwa anakula ulikuwa sehemu muhimu ya mafanikio yake. Badala ya kula milo mikubwa, alihakikisha anakula kiasi kinachotosheleza mahitaji ya mwili huku akidhibiti kiwango cha kalori anachotumia kila siku.

“Mabadiliko makubwa zaidi yalikuwa kwenye kile nilichoweka kwenye sahani yangu kila siku,” aliongeza.

Mbali na lishe, Khaligraph amesema mazoezi yamekuwa sehemu ya maisha yake ya kila siku. Ratiba yake inajumuisha mazoezi ya kuongeza nguvu za misuli, kunyanyua vyuma pamoja na mazoezi ya kuimarisha afya ya moyo na kuongeza stamina.