Simba kuwafuata Nsingizini kesho

DAR ES SALAAM: SIMBA SC inatarajiwa kuondoka kesho (Alhamisi) asubuhi kuelekea Eswatini, kwa ajili ya mchezo wa Ligi ya Mabingwa Afrika dhidi ya Nsingizini Hotspurs utakaochezwa Machi 19.

Kwa mujibu wa Msemaji wa Simba, Ahmed Ally, safari hiyo itaanza kwa ndege ya Shirika la Ndege la Tanzania (ATCL) kuelekea Johannesburg, Afrika Kusini, kisha timu itaendelea na safari kwa ndege nyingine hadi Eswatini, ambako itawasili jioni ya Machi 16.

“Timu itafanya mazoezi Machi 17 na 18 kabla ya kushuka dimbani Machi 19 kwa mchezo wa kwanza wa hatua ya awali ya Ligi ya Mabingwa Afrika,” alisema Ahmed.

Ameongeza kuwa maandalizi ya kikosi hicho yamekwenda vizuri, na wachezaji wako katika hali nzuri ya kimwili na kiakili.

“Baadhi ya wachezaji walikuwa kwenye majukumu ya timu za taifa, akiwemo Yakubu Suleiman, Abraham Morris na Steven Mukwala, ambaye amecheza vizuri akiwa na timu ya taifa ya Uganda,” alifafanua.