Messi aingia fainali ya tuzo ya MVP MLS kwa mara tatu mfululizo
MAREKANI: NYOTA wa Inter Miami, Lionel Messi, ameingia kwenye orodha ya wagombea watano wa tuzo ya mchezaji bora wa msimu (Landon Donovan MLS MVP Award) kwa mara nyingine, akilenga kutwaa tuzo hiyo kwa mwaka wa tatu mfululizo.
Messi, ambaye ametwaa tuzo hiyo katika misimu miwili iliyopita, amefikisha mabao 26 katika msimu wa kawaida wa Ligi ya Soka Marekani (MLS), idadi ya juu zaidi msimu huu, huku akitoa pasi 17 za mabao ambazo ni za pili kwa ubora.
Wachezaji wengine wanaowania tuzo hiyo ni Cavan Sullivan wa Philadelphia Union mwenye umri wa miaka 17, Evander wa FC Cincinnati, Guilherme wa Houston Dynamo na Hany Mukhtar wa Nashville SC.
Wakati huohuo, Sullivan pia ameorodheshwa kuwania tuzo ya Mchezaji Bora Chipukizi baada ya kufunga mabao tisa na kutoa pasi 14 za mabao katika mechi 29 alizocheza msimu huu.
MLS imetangaza wagombea wa tuzo nane za mwisho wa msimu, zikiwemo Kocha Bora wa Mwaka, Beki Bora, Kipa Bora na Mchezaji Bora Mpya. Washindi wa tuzo hizo watatangazwa katika kipindi cha mechi za mtoano za ligi hiyo.
