TFF yapiga kufuli Sokoine, Liti

DAR ES SALAAM: SHIRIKISHO la Mpira wa Miguu Tanzania (TFF) limeufungia uwanja wa CCM Liti uliopo mkoani Singida pamoja na limeufungia uwanja wa Sokoine wa jijini Mbeya kutumika kwa michezo ya Ligi Kuu kutokana na kutokidhi vigezo vya kikanuni na kisheria vya mchezo wa soka.

Kwa mujibu wa taarifa mbili zilizotolewa leo, Oktoba 15, 2025 na Ofisa Habari na Mawasiliano wa TFF, Cliford Mario Ndimbo, uamuzi huo umechukuliwa baada ya kubaini kuwa miundombinu ya viwanja hivyo haikidhi matakwa ya Kanuni za Leseni za Klabu (Club Lincencing), ikiwemo ubora wa nyasi, vyumba vya kubadilishia nguo na usalama wa eneo la kuchezea yaani Pitch.

TFF imezitaka timu zote zinazotumia viwanja hivyo kwa michezo ya nyumbani ya Ligi Kuu Tanzania bara kutafuta viwanja mbadala vinavyozingatia masharti ya Kanuni, hadi pale marekebisho yatakapokamilika na viwanja hivyo kukaguliwa na kupitishwa rasmi kwa matumizi ya ligi.

TFF Pia, imezikumbusha klabu zote nchini kuendelea kuboresha na kutunza viwanja vyao ili kuongeza ubora wa mchezo wa soka nchini. Huku ikisisitiza kuwa hatua hiyo inalenga kuboresha ubora wa viwanja nchini

Uwanja wa Sokoine wa Jijini Mbeya ni uwanja wa nyumbani kwa klabu ya Mbeya City huku uwanja wa Liti ni uwanja wa Nyumbani wa Singida Black Stars.