Fadlu ashikilia ‘panga’ la wachezaji Simba
DAR ES SALAAM: Meneja wa Habari na mawasiliano wa Simba Sports Club Ahmed Ally amesema kocha wa kikosi hicho Fadlu Davids anahusika moja kwa moja na kutoongezwa au kuvunjwa kwa mikataba kwa baadhi ya wachezaji wa klabu hiyo wakati huu ambao wanajiimarisha kuelekea msimu ujao
Akizungumza leo jijini Dar Es Salaam Ahmed amesema wachezaji walioondoka hadi sasa ambao ni mlinda lango Aishi Manula aliyerejea Azam FC, Valentin Nouma na kiungo Fabrice ngoma ambao licha ya kutokuwa na taarifa kutoka klabuni hapo wameaga kupitia mitandao yao ya kijamii ni kwa maoni ya kocha Fadlu
“Labda tu niseme ya kwamba chochote unachokiona ndani ya Simba kinachohusiana na wachezaji ni maoni, melekezo, mapendekezo, maelekezo na Mawazo ya Mwalimu wetu Fadlu Davids. Mwalimu ndiye anayetoa mapendekezo ya nani aletwe nani aachwe, nani auzwe na nani aongezewe mkataba ni maelekezo ya kocha Fadlu” – amesema Ahmed
Ahmed amefafanua pia juu ya kwa nini bado hawajaanza kutoa taarifa rasmi kuhusu kuachana na wachezaji kama ilivyozoeleka badala yake imeonekana wachezaji wakiaga wenyewe akisema kuwa ni taratibu za ndani ya klabu na taratibu hizo zitakapokamilika klabu hiyo itatoa taarifa rasmi.
“Taarifa za klabu bado hazijaanza kutoka kwa sababu tunaandaa mtiririko wa taarifa uliokamilika tutakapoanza kutoa taarifa tuwe na orodha yote ya wachezaji tulioachana nao na orodha ya wacezaji wote wapya ambao wameingia kwenye kikosi chetu. Kwa hiyo kwa sasa tupo kwenye mchakato wa kumalizana na mchezaji mmoja mmoja ili tuje tutoe taarifa kwa Pamoja” – ameongeza.
