Celtic yaporomoka Ulaya

LINZ: CELTIC imeandika moja ya sura zake chungu zaidi katika michuano ya Ulaya baada ya kupoteza faida ya mabao manne dhidi ya LASK na kutupwa nje ya Ligi ya Mabingwa Ulaya.

Kikosi hicho cha Scotland kilikuwa kimejijengea nafasi nzuri baada ya kupata ushindi wa mabao 4-0 katika mchezo wa kwanza, lakini kilishindwa kulinda faida hiyo katika mchezo wa marudiano uliogeuka kuwa usiku wa mateso.

LASK iliibuka na ushindi wa mabao 5-1 na kusawazisha matokeo ya jumla, kabla ya kuendelea kuitoa Celtic katika hatua hiyo kupitia muda wa nyongeza.

Celtic ilianza mchezo ikiwa na matumaini makubwa, huku bao la nahodha Callum McGregor likionekana kuongeza nafasi ya timu hiyo baada ya kufikisha faida ya jumla kuwa mabao 4-0.

Hata hivyo, mambo yalibadilika haraka baada ya LASK kupata bao la kusawazisha. Celtic ilianza kuyumba na wenyeji wakatumia udhaifu huo kuongeza mashambulizi.

LASK ilifunga mabao mengine katika kipindi cha pili na kuifanya Celtic kupoteza kabisa mwelekeo wa mchezo.

Takwimu zilionesha ukubwa wa presha iliyowekwa na wenyeji, ambapo LASK ilimaliza mchezo ikiwa imepiga jumla ya mashuti 40 dhidi ya lango la Celtic, huku 33 kati yake yakija katika dakika 90 za kawaida.

Nahodha McGregor hakuficha hasira zake baada ya mchezo, akiwakosoa wachezaji wenzake kwa kuonekana kuwa “waoga” na “wasio na ujasiri” wakati timu ilipokuwa ikikabiliwa na presha.

Kocha Martin O’Neill pia alikubali kuwajibika kutokana na kipigo hicho, akikitaja kuwa miongoni mwa usiku mbaya zaidi katika maisha yake ya soka.

Kutokana na kuondolewa katika Ligi ya Mabingwa, Celtic sasa italazimika kuendeleza safari yake ya michuano ya Ulaya kupitia Europa League.