Kumekucha mbio za Ngorongoro 2023
NGORONGORO Race 2023 itafanyika Septemba 24 huku wanariadha kibao wa ndani na nje ya nchi wanatarajia kushiriki.
Mbio hizo zimekuwa zikishirikisha wakimbiaji wa kilometa 21, 10 na tano kwa watoto, huku lengo kuu likiwa ni kuibua vipaji na kusaidia watoto wanaoishi katika mazingira magumu.
Kwa mujibu wa mratibu na muandaaji wa mbio hizo, Meta Petro maandalizi yanaendelea na mwaka huu wanatarajia mbio hiyo itakuwa ya aina yake kwani itaandaliwa kwa vigezo vya kimataifa.
MAANDALIZI
Petro anasema kuwa mbio hiyo itafanyika Septemba 24 na wanatarajia washiriki wengi
watachuana kutoka ndani na nje ya nchi na kuzifanya kuwa za kimataifa zaidi.
Anasema kuwa mbio ya kilometa 21 itaanzia katika lango ya kuingilia na kutokea katika Hifadhi ya Ngorongoro na kuishia katika viwanja vya Mazingira Bora mjini Karatu mkoani Arusha.
Anasema kuwa kuna mambo mengi yatakuwa na ratiba itakuwa na baadhi ya burudani kutoka katika vikundi mbalimbali vya wilayani Karatu katika Uwanja wa Mazingira Bora.
USAJILI
Meta anasema kuwa usajili kamili unatarajia kuanza Agosti 15 na utaendelea hadi siku
moja kabla ya mbio yenyewe katika vituo vitakavyotangazwa Karatu na jijini Arusha. Amewataka washiriki kuchangamkia usajili kwani kutakuwa na idadi maalumu na wakifikia idadi hiyo zoezi la usajili litafungwa.
Anasema kuwa kila anayesajili atapewa namba yake ya kukimbilia na kila atakayemaliza mbio atavishwa medali yake, na hakutakuwa na ubabaishaji. “Medali zitakuwepo za kutosha na kila atakayemaliza mbio atakabidhiwa medali yake bila kujali amemaliza wa ngapi,” anasema Meta katika mazungumzo hayo ya HabariLEO.
Meta ambaye ni mwanariadha wa zamani wa kimataifa wa Tanzania anasema kuwa huo ni msimu wa 16 tangu kuanza kufanyika kwa mbio hizo.
MAFANIKIO
Anasema kuwa kila mwaka mbio hizo zimekuwa na msisimko na idadi ya washiriki
imekuwa ikiongezeka na kuvutia watu kutoka ndani na nje ya nchi.
Pia mbio hizo zimekuwa kivutio kikubwa cha utalii, ambapo watu wengi hujitokeza hasa katika ile ya kilometa 21 inayoanzia langoni mwa Hifadhi ya Ngorongoro ili kushuhudia vivutio vya utalii vilivyopo katika hifadhi hiyo.
Wanariadha wengi nyota kama akina Alphonce Simbu, Gabriel Geay, Emmanuel Giniki, Failuna Abdi, Jaquline Sakilu na wengine wengi wamekuwa wakishiriki mbio hizo. Nyota hao wameifanya mbio hiyo kuwa na ushindani mkubwa na kuiongezea msisimko mkubwa.
WADHAMINI
Petro anasema kuwa bado milango iko wazi kwa wdhamini na taasisi zingine kujitokeza ili
kuhakikisha mbio hiyo inatimiza malengo ya kuinua vipaji na kuwasaidia watoto waliopo katika mazingira magumu.
“Bado milango iko wazi kwa taasisi na watu binafsi kujitokeza kudhamini mbio hizi ili kuhakikisha tunafikia malengo yetu, ambayo ni kuwasaidia watoto na kuibua vipaji,” anasema Petro katika mahojiano hayo.
