Timu ya taifa mpira wa kikapu vitani leo

KOCHA wa timu ya taifa ya mpira wa kikapu ya Tanzania ( Tanzanites) Mbwana Mohamed amesema watanzania hawapaswi kukata tamaa juu ya matokeo ya timu hiyo kwani ana imani na vijana wake.
Kocha huyo amesema kikosi chake kitafanya vyema kwenye mashindano ya mpira wa kikapu ya Afrika yanayoendelea kwenye uwanja wa ndani wa Benjamini Mkapa.
Tanzania leo itatupa karata yake ya tatu kwenye michuano hiyo ikivaana na Rwanda ambapo kocha Mohamed anasema wapo tayari kwa mchezo huo ,licha ya changamoto za maumbo madogo kwa wachezaji wake.
“Maumbo ya wachezaji wetu ni madogo ukilinganisha na wapinzani wetu, lakini tutapambana kwa kadri ya uwezo wetu”, amesema Mohamed.
Tayari Tanzania imecheza michezo miwili kwenye mitanange hiyo ambapo mchezo wa kwanza waliibuka na ushindi wa alama 69-34 dhidi ya Eritrea na mchezo wa pili wakapoteza alama 77 -63 dhidi ya Burundi.




