Naibu Waziri atoa maagizo ya kukamilika kwa Uwanja wa Benjamin Mkapa
DAR ES SALAAM:NAIBU Waziri wa Habari, Utamaduni, Sanaa na Michezo, Hamis Mwinjuma maarufu kama Mwana FA, amemuagiza mkandarasi anayesimamia ukarabati wa Uwanja wa Benjamin Mkapa kuhakikisha maeneo muhimu ya uwanja huo yanakamilika ifikapo Mei 10, 2025.
Agizo hilo limetolewa katika ziara yake ya kukagua maendeleo ya ukarabati huo, hususan eneo la kuchezea (pitch) ambalo linahitajika kuwa katika hali bora kwa ajili ya fainali ya Kombe la Shirikisho Afrika kati ya Simba SC na RS Berkane.
Katika maelezo yake, Mwana FA amesema Serikali kupitia Rais Samia Suluhu Hassan imetoa maelekezo maalum kuhakikisha Watanzania wanashuhudia historia ya kipekee, kwani mara ya mwisho fainali ya CAF ilichezwa Tanzania ilikuwa ni mwaka 2023 ambapo Yanga SC walicheza fainali, na kabla yake mwaka 1993 Simba walifika hatua hiyo.
Mwaka huu, fainali hiyo itachezwa tena nchini na Simba watakuwa wenyeji wa mchezo wa marudiano Mei 25, baada ya kuanza ugenini Mei 17.
“Tunataka Watanzania wajivunie, wajione sehemu ya historia. Kombe linakuja hapa nyumbani na tunataka uwanja huu uwe tayari kulipokea,” amesema Mwana FA.
Ameongeza kuwa uwanja unapaswa kuwa tayari kwa watazamaji zaidi ya 63,000 kushuhudia tukio hilo la kihistoria.
Amesema changamoto kubwa iliyojitokeza ni ubora wa sehemu ya kuchezea hasa baada ya mechi ya robo fainali kati ya Simba na Al Masry, hivyo eneo hilo linapewa kipaumbele cha ukamilishaji.
Ametoa maelekezo ya ukarabati wa miundombinu mingine muhimu ndani ya uwanja huo, ikiwemo kukamilisha benchi la ufundi la waamuzi kwa kuweka mataili, kuweka viti vya muda katika sehemu zilizo wazi, na kuhakikisha ifikapo Ijumaa kazi hizo ziwe zimemalizika.
Naibu Waziri pia ametoa saa 24 kwa mkandarasi kukamilisha milingoti ya bendera, chumba cha udhibiti wa matumizi ya dawa za kuongeza nguvu michezoni, pamoja na mfumo wa kupooza joto katika vyumba vya wachezaji.
Ukarabati huu unafanyika kwa kasi ili kuhakikisha kuwa Simba wanacheza fainali hiyo katika mazingira bora, ya kitaifa na ya kimataifa, na kuipa Tanzania heshima ya kuwa mwenyeji wa tukio kubwa la soka barani Afrika.
