Mke wa Albert Ojwang aweka wazi aliyoelezwa na mwanablog kabla hajafa
NAIROBI:MKE wa mwalimu na mwanablogu Albert Ojwang, mwenye umri wa miaka 31, ameibuka na kueleza maneno ya mwisho aliyoelezwa na mume wake huyo kabla hajakamatwa na polisi na kufariki katika hali ya kutatanisha nchini Kenya.
Ojwang alifariki dunia Juni 8, 2025 huku taarifa za awali akidaiwa kwamba alikuwa na kiwewe kichwani pamoja na majeraha mengi yakijumuisha shambulio la kikatili. Kifo chake kimeibua hasira ya umma, huku wito ukiongezeka wa uwajibikaji kutoka kwa mashirika ya haki za binadamu na raia nchini humo.
Anayeongoza mashtaka ya haki ni mjane huyo, Nevnina Onyango mwanafunzi wa uuguzi na mama wa mtoto wao mdogo. Aliiambia Citizen TV, mazungumzo ya mwisho aliyozungumza na mumewe baada ya kukamatwa, ambapo alionesha wasiwasi mkubwa kwa usalama wake.
“Aliendelea kuuliza ikiwa atakuwa salama,” alisema huku akitokwa na machozi. “Hakujisikia kuwa salama alipokuwa kizuizini. Nataka kila mtu ajisikie kulindwa anapozuiliwa. Polisi wanapaswa kulinda maisha, na sio kuwamaliza.”
Nevnina, ambaye amekuwa Nairobi tangu mkasa huo utokee, alikutana na Gavana wa Nairobi, Johnson Sakaja na ameendelea kutafuta uungwaji mkono wa umma kwa ajili ya kuwajibishwa kwa waliohusika na kifo cha mwanablog huyo.
“Maumivu haya hayawezi kufikiria. Hakuna mtu anayepaswa kupoteza mpendwa wake,” amesema. “Hatuwezi kumrejesha Albert, lakini kuwawajibisha waliohusika kutatupatia amani. Ninawaomba Wakenya kusimama nasi katika vita hivi vya kutafuta haki.”
Katikati ya malalamiko yake, Nevnina sasa anakabiliwa na kazi ya kuhuzunisha zaidi ya namna atakavyoelezea kifo cha Albert kwa mtoto wao mchanga, George Myles Ojwang.
Katika mahojiano hayo mtoto huyo anadaiwa kuanza kujihisi huzuni inayomzunguka. “Amesikia watu wakilia na kutaja ‘Omondi’ baba yake. Siku moja, aliniuliza, ‘Je, ni kweli Baba amekufa?’ Nikamwambia, ‘Hapana, hajafa,’’.
