Scaloni aongeza mkataba Argentina hadi 2030

BUENOS AIRES, Argentina: KOCHA wa timu ya taifa ya Argentina, Lionel Scaloni, ameongeza mkataba wake wa kuinoa timu hiyo hadi Julai 2030, Shirikisho la Soka la Argentina (AFA) limetangaza.

Scaloni, aliyeiongoza Argentina kutwaa Kombe la Dunia mwaka 2022 nchini Qatar pamoja na mataji mawili ya Copa America, alikuwa na mkataba uliotarajiwa kumalizika Desemba 2026.

Uamuzi wa kuongeza mkataba huo unakuja baada ya kocha huyo kuonesha mashaka kuhusu mustakabali wake kufuatia Argentina kufungwa na Hispania katika fainali ya Kombe la Dunia mwezi Julai 2026.

Rais wa AFA, Claudio Tapia, amesema makubaliano hayo yanahusu benchi lote la ufundi kwa kipindi cha mwaka 2027 hadi 2030. Scaloni naye amesema ana furaha kuendelea na kazi hiyo akiwa na ari ileile aliyokuwa nayo alipoanza.

Kwa sasa kocha huyo anaendelea kujenga kikosi kipya baada ya Lionel Messi kustaafu soka la kimataifa. Katika kikosi chake cha wachezaji 28 kwa mechi za kirafiki za Novemba, amemjumuisha kwa mara ya kwanza beki wa Chelsea, Aaron Anselmino, huku Gonzalo Montiel na Mariano Troilo wakirejea kikosini.