Azam yamsajili beki wa DR Congo, Nathan Fasika

DAR ES SALAAM:AZAM FC imeendelea kuimarisha kikosi chake kuelekea msimu mpya baada ya kutangaza kumsajili beki wa kimataifa wa Jamhuri ya Kidemokrasia ya Congo (DR Congo), Nathan Idumba Fasika.

Fasika, mwenye umri wa miaka 27, anacheza nafasi ya beki wa kati na ana urefu wa sentimita 191. Ni mchezaji mwenye uzoefu wa soka la kimataifa, akiwahi kuitumikia timu ya taifa ya DR Congo.

Usajili huo unaongeza nguvu katika safu ya ulinzi ya Azam, ambayo chini ya Kocha Florent Ibenge imekuwa ikifanyiwa maboresho makubwa kuelekea msimu wa 2026/27.

Azam imekuwa moja ya klabu zilizokuwa na shughuli kubwa katika dirisha la usajili, huku ikiongeza wachezaji kadhaa wa kigeni katika maandalizi ya msimu mpya na mashindano ya kimataifa.

Fasika ana uzoefu wa kucheza soka nje ya DR Congo, ikiwa ni pamoja na Cape Town City ya Afrika Kusini na Chippa United, kabla ya kuhamia Al-Ahly Benghazi ya Libya mwaka 2026.

Usajili wa Fasika unaongeza ushindani katika kikosi cha Azam huku klabu hiyo ikilenga kupambana kwenye Ligi Kuu Tanzania Bara pamoja na kufanya vizuri zaidi katika mashindano ya Afrika.