FIFA yakubali maofisa wake kuchunguzwa
ZURICH: SHIRIKISHO la Soka Duniani (FIFA) limekubali kuwapa wajumbe wa Baraza lake nafasi ya kupitia nyaraka muhimu zinazohusiana na mpango uliositishwa wa kuuza hisa za mashindano ya Kombe la Dunia kwa wawekezaji binafsi.
Hatua hiyo imekuja kufuatia mvutano ulioibuka kuhusu pendekezo la Rais wa FIFA, Gianni Infantino, lililojulikana kama FIFA Forward Enterprise (FFE), ambalo lililenga kufungua fursa za uwekezaji binafsi katika mashindano makubwa yanayoendeshwa na shirikisho hilo.
Kwa mujibu wa chanzo kilicho karibu na FIFA kilichozungumza na Shirika la Habari la AFP, wajumbe wa Baraza la FIFA, wakiwemo makamu wa rais wanane, wamejulishwa kuwa wataruhusiwa kuona nyaraka muhimu zinazohusu mpango huo. Baraza hilo lina jumla ya wajumbe 37, akiwemo Infantino.
Kupitia barua iliyotumwa Jumatatu na Katibu Mkuu wa FIFA, Mattias Grafstrom, wajumbe wametakiwa kuwasilisha maombi yao ndani ya wiki mbili ikiwa wanataka kupitia nyaraka hizo ana kwa ana katika mazingira maalumu yaliyowekwa na shirikisho hilo.
Nyaraka hizo zitapatikana katika makao makuu ya FIFA jijini Zurich, Uswisi. Uamuzi huo umefikiwa wakati ambapo Shirikisho la Soka Ulaya (UEFA) limekuwa likitaka maelezo zaidi kuhusu mpango wa FFE, ambao ulifichuliwa mwishoni mwa Julai na kusababisha mjadala mkubwa ndani ya uongozi wa soka duniani.
UEFA imekuwa mstari wa mbele kupinga mpango huo, ambao ungefungua mashindano makubwa ya FIFA, yakiwemo Kombe la Dunia, kwa uwekezaji kutoka kwa makampuni na wawekezaji binafsi. Kutokana na upinzani huo, Infantino alilazimika kuachana na pendekezo hilo baada ya kuzuka kwa malalamiko.
UEFA ilikuwa imeipa FIFA hadi Novemba 2 kujibu maswali na maombi mbalimbali ya taarifa kuhusu mpango huo, lakini muda huo ulipita bila FIFA kutoa majibu. Awali, Katibu Mkuu wa UEFA, Theodore Theodoridis, alimtumia Grafstrom barua yenye zaidi ya maswali 40 kufuatia mkutano wa Baraza la FIFA uliofanyika Oktoba 15.
Mbali na mpango wa uwekezaji binafsi, UEFA iliibua masuala mengine yanayohusu uamuzi wa FIFA kumtunuku Rais wa Marekani, Donald Trump, tuzo ya Amani ya FIFA pamoja na hatua ya kusitisha adhabu ya kadi nyekundu aliyokuwa ameoneshwa mchezaji wa Marekani, Folarin Balogun, wakati wa Kombe la Dunia kufuatia uingiliaji kati wa Rais huyo.
FIFA ilieleza kuwa kujibu maswali yote ndani ya muda uliowekwa haikuwa jambo linalowezekana kiutendaji.
Mvutano huo umeongezeka zaidi baada ya UEFA kuwasilisha suala hilo katika mahakama moja nchini Florida, Marekani, kwa lengo la kukusanya ushahidi ambao unaweza kutumika katika malalamiko ya kisheria dhidi ya Infantino nchini Uswisi.
UEFA imeeleza kuwa inachunguza uwezekano wa kuwasilisha malalamiko yanayohusiana na madai ya usimamizi mbaya wa fedha na uendeshaji wa FIFA.
Hata hivyo, madai hayo bado ni sehemu ya mchakato wa kutafuta taarifa na hayajathibitishwa kuwa makosa ya jinai. FIFA haijatoa majibu ya kina kuhusu maswali yote yaliyowasilishwa na UEFA, huku uamuzi wa kuruhusu wajumbe wa Baraza lake kuona nyaraka ukifungua hatua nyingine ya mjadala kuhusu uwazi na usimamizi wa taasisi hiyo.
