India yanyakua medali ya kwanza michuano ya Olympic ya vijana
DAKAR: MWANAMICHEZO Rajkumari Lanchenbi Chanu ameandika historia baada ya kuipa India medali yake ya kwanza kabisa katika mchezo wa wushu kwenye Michezo ya Olympic ya Vijana 2026 inayoendelea jijini Dakar, Senegal.
Rajkumari alitwaa medali ya shaba katika mashindano ya wanawake ya changquan combined, na kuifanya India kufikisha jumla ya medali tatu katika mashindano hayo. Mafanikio hayo yamekuwa hatua muhimu kwa mchezo wa wushu nchini India, ambao kwa mara ya kwanza umejumuishwa katika mpango rasmi wa michezo ya kuwania medali kwenye Olympic za Vijana.
Rajkumari, ambaye anatokea jimbo la Manipur nchini India, alipata jumla ya alama 18.039 na kumaliza katika nafasi ya tatu. Katika sehemu ya gunshu, iliyohusisha matumizi ya silaha za jadi, alipata alama 8.723, huku katika changquan, inayohusisha maonesho ya mbinu za mapigano bila silaha, akikusanya alama 9.316. Jumla hiyo ilitosha kumhakikishia medali ya shaba katika ushindani uliokuwa na wanamichezo wenye vipaji kutoka mataifa mbalimbali.
Medali ya dhahabu ilichukuliwa na Sondos Sonbol kutoka Misri aliyepata alama 18.660, huku Valeria Frannerys Dudamel Alvarado wa Venezuela akitwaa medali ya fedha kwa alama 18.199. Ushindani huo ulikuwa mkali, huku Rajkumari akionesha uwezo mkubwa wa kiufundi na nidhamu katika maonesho yake yote mawili. Kabla ya kufika fainali, mwanamichezo huyo wa India alikuwa amefanya vizuri katika hatua ya awali na kumaliza nafasi ya pili kati ya washiriki 12 kwa jumla ya alama 17.982.
Mashindano ya changquan combined ni sehemu ya wushu inayohusisha maonesho maalumu ya mbinu za mapigano yanayojulikana kama taolu. Nidhamu hiyo inachanganya maonesho ya mapigano bila silaha pamoja na matumizi ya silaha, ambapo washiriki hupata alama katika kila sehemu na kisha kujumlishiwa ili kupata matokeo ya mwisho.
Mashindano hayo yalifanyika kwa muda wa siku tatu, huku wanamichezo wanane bora kutoka hatua ya awali wakifuzu kushiriki fainali. Kwa Rajkumari, kufuzu na hatimaye kushinda medali katika mashindano hayo kumekuwa mafanikio makubwa katika safari yake ya kimichezo.
Chama cha Wushu cha India kimepongeza mafanikio ya mwanamichezo huyo, kikisema ameandika ukurasa mpya katika historia ya mchezo huo nchini humo. Katika taarifa yake, chama hicho kilieleza kuwa ushindi huo umetokana na juhudi, bidii na dhamira ya Rajkumari, pamoja na mchango wa makocha na wafanyakazi wa timu ya maandalizi. Rajkumari alikuwa mwakilishi pekee wa India katika mchezo wa wushu kwenye mashindano hayo, lakini aliweza kuonesha ushindani mkubwa na kuipa nchi yake heshima ya kimataifa.
Wengine waliotwaa medali kwa India hadi leo ni Khushbu Rajakbhai Darjada alitwaa medali ya fedha katika mchezo wa judo wanawake wa uzito wa kilo 63, huku mwogeleaji Dhinidhi Desinghu akishinda medali ya shaba katika mashindano ya kuogelea mita 100 freestyle wanawake
