Arsenal, Liverpool, Bayern Munich wamwinda Barcola
PARIS: Nyota wa Paris Saint-Germain (PSG), Bradley Barcola, ameendelea kuwa gumzo katika dirisha la usajili la Ulaya baada ya kuvutia maslahi ya klabu kadhaa kubwa kufuatia kiwango chake bora alichoonyesha msimu uliopita.
Taarifa kutoka vyombo mbalimbali vya habari barani Ulaya zinaeleza kuwa Arsenal, Liverpool, Bayern Munich na klabu nyingine zimekuwa zikifuatilia kwa karibu maendeleo ya winga huyo wa Ufaransa, ambaye ameibuka kuwa mmoja wa wachezaji muhimu wa PSG.
Barcola, mwenye kasi na uwezo mkubwa wa kupenya mabeki, amekuwa na mchango mkubwa katika safu ya ushambuliaji ya PSG, jambo lililowafanya maskauti wa vigogo hao kuamini anaweza kuimarisha vikosi vyao kabla ya kuanza kwa msimu mpya.
Hata hivyo, PSG inaelezwa kutokuwa tayari kumuuza mchezaji huyo kirahisi, ikiamini bado ana nafasi kubwa ya kuwa mmoja wa nyota wa baadaye wa klabu hiyo na timu ya taifa ya Ufaransa.
Licha ya tetesi hizo kuendelea kushika kasi, Barcola ameendelea kuweka mkazo kwenye maandalizi ya msimu mpya, huku akiacha uamuzi wa hatima yake mikononi mwa uongozi wa PSG.
Dirisha la usajili la majira ya kiangazi linaendelea kushuhudia ushindani mkubwa kati ya klabu za Ulaya, huku nyota kadhaa wakihusishwa na uhamisho wa mamilioni ya euro kabla ya kuanza kwa ligi mbalimbali.
