Yanga yazindua shule ya soka kwa watoto
DAR ES SALAAM: KLABU ya Yanga imeandika historia mpya baada ya kuzindua rasmi Yanga Soccer School, shule maalum ya soka kwa watoto na vijana, ikiwa ni sehemu ya mkakati wa klabu hiyo kukuza na kuendeleza vipaji vya soka kuanzia ngazi za chini.
Akizungumza katika hafla ya uzinduzi iliyofanyika makao makuu ya klabu hiyo Leo, Mtendaji Mkuu wa Yanga SC, Andre Mtine, alisema shule hiyo ya soka itawahusisha watoto wa umri wa miaka 11, 13 na 15, na kwamba itakuwa nguzo muhimu katika kukuza wanasoka wa baadaye wa Tanzania.
“Tuna watoto wengi sana wenye ndoto za kuwa wachezaji, lakini wanakosa daraja sahihi la kuwafikia. Shule hii ya soka itawawezesha kupata maarifa na msingi bora wa soka la kisasa,” alisema Mtine.
Mtine aliongeza kuwa mfumo wa Yanga Soccer School umeundwa kwa kuzingatia viwango vinavyotumika na klabu kubwa duniani, na kwamba uzinduzi huo umehudhuriwa na wadau mbalimbali akiwemo Pitso Mosimane, kocha wa zamani wa Mamelodi Sundowns na Al Ahly.
“Mfumo huu ni moja kati ya nyenzo imara zinazotumika duniani kote. Tumewaalika wadau wengi kushuhudia hatua hii muhimu ya kuwekeza kwa vijana wetu,” alisisitiza Mtine.
Kwa upande wake, Msemaji wa Klabu hiyo, Ally Kamwe, alisema uanzishwaji wa shule hiyo umetokana na uhitaji mkubwa wa watoto wanaotamani kujifunza soka kitaalamu.
“Kwa mujibu wa sensa, watoto wenye umri wa miaka 0 hadi 13 ni zaidi ya milioni 20, wengi wao wakiwa na ndoto za kucheza mpira. Wazazi wamekuwa wakitafuta maeneo salama na yenye ubora wa kuwapa mafunzo. Yanga imeona ni muhimu kujenga daraja hilo,” alisema Kamwe.
Mkurugenzi wa Michezo wa Yanga SC, Paul Mathew, alifafanua kuwa mradi huo utakuwa chachu ya kukuza vipaji na kuandaa wanasoka watakaokuja kujiunga na timu za vijana za klabu hiyo.
“Kupitia Yanga Soccer School, tutawanoa watoto wenye vipaji na kuwapa maarifa sahihi ya soka. Tumeandaa mtaala maalum utakaowawezesha kuendelea kitaaluma na kitaifa. Hii ni sehemu salama na yenye hadhi kwa wazazi wanaotaka watoto wao wajengewe msingi imara wa soka,” alisema Mathew.
Aidha, Mkurugenzi wa Mashindano wa Yanga SC, Ibrahim Mohamed, alitoa ufafanuzi kuhusu ada na taratibu za usajili, akibainisha kuwa ada ya mwezi wa kwanza ni sh 600,000, ikijumuisha sh 50,000 ya usajili, sh 150,000 ya vifaa, na sh 400,000 ya mafunzo.
“Baada ya mwezi wa kwanza, ada ya kila mwezi itakuwa sh 400,000. Fomu za kujiunga zinapatikana makao makuu ya klabu Jangwani, na uzinduzi rasmi utafanyika tarehe 15 Novemba 2025,” alisema Mohamed.
