Wolper aibua mjadala kuhusu malezi ya watoto

DAR ES SALAAM: STAA wa filamu nchini, Jacqueline Wolper, ameibua mjadala mpana mitandaoni baada ya kuweka wazi hisia zake za ndani kuhusu dini ya Kiislamu, akieleza kuvutiwa kwake kwa kiasi kikubwa na imani hiyo pamoja na matamanio ya kuona watoto wake wakikua wakiifahamu na kuiheshimu.

Kupitia ukurasa wake wa mitandao ya kijamii, Wolper amefunguka kuwa amekuwa akiguswa kwa undani na baadhi ya miondoko ya Kiislamu, hususan sauti za adhana, swala na kaswida, ambazo humgusa kihisia na kumpa amani ya moyo.

“Napenda sana kusikia swala na kaswida za Kiislamu. Nasisimkwa, nafurahia. Kuna wakati hata nilitamani wanangu waijue dini hii pia, pamoja na ya kwao. Sijui nakosea? Sijui ni nini?” aliandika Wolper kwa hisia nzito.

Alipoguswa hadi kutoa machozi akieleza zaidi, Wolper amesema mapenzi yake kwa imani ya Kiislamu si ya juu juu, bali ni hisia za ndani kabisa zinazomfanya wakati mwingine ashindwe kuzuia machozi anaposikia dua au nyimbo za dini hiyo.

Hisia za ndani: Wolper Amekiri hulia mara kadhaa anaposikiliza dua na maombi ya Kiislamu.

Heshima kwa Imani: Amewataka Waislamu kuendelea kusali bila kuchoka, akisisitiza kuwa hata upande wa pili (Wakristo) kuna watu wanaopenda na kuheshimu wanachokifanya.

Ujumbe wa Amani: Amemalizia kwa kusema, “Mashallah, keep praying. Tunapenda na tunaheshimu wengine huku.”

Mjadala wa Malezi na Uvumilivu wa Kidini
Kauli hiyo imeibua mjadala mpana miongoni mwa mashabiki wake na jamii kwa ujumla, hasa kuhusu misingi ya malezi ya watoto.

Je, ni busara kwa mtoto kulelewa akifahamu misingi ya dini mbili tofauti Ukristo na Uislamu? Au ni vyema mtoto akue katika imani moja ya wazazi wake ili kuepuka mkanganyiko?
Kwa upande wake, Wolper ameacha mjadala huo wazi, akionyesha wazi kuwa kwake, imani, upendo na heshima kwa binadamu wenzetu havipaswi kuwa na mipaka ya kidini.

Je, una maoni gani? Ni hatua ya kuhimiza uvumilivu wa kidini au inaweza kuwachanganya watoto?