Mabondia kugawa mitungi ya gesi

DAR ES SALAAM: Mabondia wa ngumi za kulipwa wakiongozwa na Abdallah Pazi ‘Dulla Mbabe’ wanatarajia kugawa mitungi ya gesi kwa wafanyabiashara wa soko la Magomeni ikiwa ni sehemu ya kuunga mkono matumizi ya nishati safi ya kupikia.

Akizungumza na waandishi wa habari Dar es Salaam Mkurugenzi wa Mafia Promotion Ally Zayumba amesema mabondia wa ndani na kimataifa wataungana siku ya kupima uzito kesho kuwasaidia wafanyabiashara mitungi hiyo.

Ugawaji huo wa mitungi ya gesi unakuja ikiwa ni maandalizi ya pambano la usiku wa Knockout ya Mama litakaloshirikisha mabondia zaidi ya 10 kutoka mataifa mbalimbali.

Zayumba amesema wanataka kutumia pambano hilo kutangaza mambo mazuri yanayofanywa na Rais Samia Suluhu Hassan na kuunga mkono kwa kurudisha kwa jamii.

Pambano la Knockout ya Mama litafanyika Ijumaa ya Februari 28, mwaka huu ambapo mbali na Dulla Mbabe wengine watakaopanda ulingoni ni pamoja na Oscar Richard, Richard Mtangi, Yohana Mchanja, Calolo Amir, Said Chino, Amir Matumla na wengine kibao.

Pambano Kuu litakuwa ni kati ya mtoto wa bondia wa zamani Rashid Matumla, Amir Matumla dhidi ya Paulus Amavila kutoka Namibia