“Kundi la Kifo? Tutashindana na Mabingwa” Pedro
ZANZIBAR: KOCHA Mkuu wa Yanga SC, Pedro Goncalves, amesema kuwa mchezo wa kesho dhidi ya FAR Rabat utakuwa changamoto kubwa, lakini timu yake ipo tayari kuushinda.
Akizungumza na waandishi wa habari kuhusu maandalizi ya mchezo huo Leo, amesema:
“Kesho ni mchezo wetu wa kwanza kwenye hatua ya makundi. Kila mtu anasema ni kundi la kifo kwa sababu kuna timu kubwa nne. Lakini kama unataka kuwa bingwa, lazima ushindane na mabingwa,” amesema Goncalves.
“FAR Rabat wana timu nzuri yenye wachezaji bora, lakini sisi pia tuna muunganiko mzuri. Tukipata hamasa ya kutosha kutoka kwa mashabiki wetu, basi tutakuwa na mchezo bora zaidi,” aliongeza.
Kocha huyo pia ameeleza kuwa yupo makini na mipango ya wapinzani wake eneo la kiungo. “Nafahamu wapinzani wetu wamejipanga sana eneo la kiungo. Nina wachezaji 32, isipokuwa nina wachezaji wawili ambao wapo majeruhi. Mmoja wao ni Clement Mzize, ambaye ningependa kumpongeza kwa kushinda tuzo ya goli bora Afrika. Nina imani tuzo hii itampa hamasa ya kupambana ili kurejea uwanjani na ari kubwa,” alisema Goncalves.
Akielezea falsafa yake ya mchezo, Goncalves alisema: “Falsafa yangu ni kuutawala mchezo kwa gharama yoyote ile. Nahitaji wachezaji wangu wajitume sana. Malengo yangu makubwa ni timu kucheza vizuri. Matokeo ya mchezo wa kesho naamini yatatokana na namna ambavyo tutacheza vizuri. Naamini matokeo mazuri yanatokana na kuongeza utulivu na umakini wa wachezaji.”
Kocha huyo aliendelea kueleza dhamira ya klabu ni kushinda taji la Afrika akisema bado wapo kwenye mchakato bora wa kufika pale wanapohitaji.
” Haijalishi ni lini tutapata kombe hilo, lakini dhamira ndiyo muhimu. Ikiwa tutaendelea na mradi huu, basi tutafikia malengo yetu. Ili kusonga mbele, tunapaswa kufanya tathmini ya hatua tunazochukua kwenye mchezo.”
Kwa mujibu wa Goncalves, mashabiki wana nafasi kubwa katika kuhamasisha wachezaji na kuhakikisha Yanga inatimiza ndoto ya kushinda kombe la klabu bingwa barani Afrika.
