ALPHONCE SIMBU>>Aenda Budapest kimyakimya

MWANARIADHA wa kimataifa wa Tanzania, Alphonce Simbe amesema kuwa licha ya kuondoka kinyonge, lakini ana matumaini makubwa ya kufanya vizuri katika Mashindano
ya Dunia ya Riadha huko Budapest, Hungary.

Simbu aliondoka nchini kwenda Hungary bila ya kufanyiwa hafla rasmi ya kumuga, ambayo pia ingeandana na kukabidhiwa bendera ya taifa licha ya kuwa mwanariadha pekee
anayeiwakilisha nchi katika mashindano hayo.

Akizungumza katika mahojiano maalum na mwandishi wa makala haya, Simbu anasema kuwa aliwasili Budapest tangu Jumanne jioni na anaendelea vizuri na mazoezi madogo madogo kabla ya kuingia `vitani’ kesho Jumapili.

MAANDALIZI YAKE
Simbu alikuwa akifanya mazoezi jiini Arusha takribani kwa kipindi cha miezi mitatu akijigharamia mwenyewe bila msaada kutoka kwa Shirikisho la Riadha Tanzania (RT) wala
Baraza la Michezo la Taifa (BMT), ambalo awali liliahidi kusaidia.

Anasema kuwa amekuwa katika maandalizi chini ya mwajiri wake ambaye ni Jeshi la Wananchi wa Tanzania (JWTZ) na kocha wake, Athony Muingereza, akifanya mazoezi na kurudi nyumbani.

Anasema kuwa anajiona amefanya mazoezi ya kutosha kumuwezesha kutwaa medali katika mashindano hayo makubwa licha ya kuachwa mpweke katika maandalizi na hata kuondoka
kwake.

Anasema kwake yeye suala la kuagwa sio kitu kikubwa, hasa ukizingatia kuwa aliachwa mwenyewe katika maandalizi yake bila kusaidiwa kitu chochote, ikiwemo vifaa na vitu vingine kama chakula, matibabu na huduma zingine…

“Kwangu mimi kuondoka bila kufanyiwa sherehe ya kuagwa kama wanavyofanya majirani zetu Kenya na Uganda, hiyo sio ishu kubwa, jambo kubwa ni maandalizi na kama sikusaidiwa kwa lolote katika maandalizi yangu, basi kuagwa hakuna maana, nimezoea kujiandaa mwenyewe bila msaada wa RT au BMT, “anasema Simbu.

RT, BMT WANENA
Rais wa Shirikisho la Riadha Tanzania (RT), Silas Isagi anasema kuwa RT ndio ilimpatia
tiketi Simbu kwenda Budapest, na kuna viongozi walimwambia (Isagi) kutoa fedha kwa
ajili ya kumuaga Simbu.

“Fulani (anamtaja jina) alinitaka nitoe pesa ili kumuaga Simbu, nilitoa pesa lakini sina uhakika kama ilifanyika kwani sipewe mrejesho, unawajua watu, tena inawezekama ukatoa
pesa na wasifanye walichoahidi, “anasisitiza Isagi.

Katibu Mkuu wa Baraza la Michezo la Taifa (BMT), Neema Msitha anasema kuwa wanamtakia kila la heri Simbu na wanajua kuwa ni mwanariadha mwenye nidhamu na kupenda kazi yake, hivyo wana tumaini atafanya vizuri.

Alipoulizwa kuhusu hafla ya kumuaga, Msitha anasema kuwa walikuwa na taarifa ya safari yake, lakini muingiliano wa mambo ndio ulisababisha washindwe kuandaa hafla hiyo.

Simbu anasema kuwa kuna mtu wa BMT alimuuliza kuhusu ratiba yake alimwambia amepumzika na ataenda mazoezini na baadae atarudi tena hotelini.

Anasema kuwa baadae aliporudi alikuta bendera hiyo ya taifa chumbani kwake hotelini hapo, ambayo aliondoka nayo kwenda Budapesta, huku akisisitiza kikubwa chake alihitaji msaada wakati wa maandalizi na sio kukabidhiwa bendera.

Mwanariadha huyo mwenye medali ya shaba katika mashindao ya dunia yaliyofanyika
London mwaka 2017 anasema kuwa lengo lake kubwa ni kuondoka na medali ya dhahabu na kuwa Mtanzania wa kwanza kupata medali hiyo kutoka katika mashindano hayo.

Christopher Isigwe ndiye Mtanzania wa kwanza kupata medali katika mashindano ya dunia yaliyofanyika Helsinki, Finland mwaka 2005 baada ya kumaliza wa pili na kupata medali ya fedha kwa kutumia saa 2:10:21.

Simbu alimaliza wa tatu katika Mashindano ya Dunia ya Riadha yaliyofanyika London, Uingereza mwaka 2017 kwa muda wa saa 2:09:51 na kuondoka na medali ya shaba.

Msemaji wa RT, Lwiza John alikaririwa hivi karibu akimtaka mwanariadha huyo kuendelea vizuri na maandalizi yake bila wasiwasi wowote, kwani kila kitu kitakwenda vizuri na atarudishiwa gharama zake.

Lwiza amesema kuwa RT ilipeleka bajeti kwa BMT kwa ajili ya maandalizi ya Simbu na iliikubali, hivyo atarudishiwa gharama zote alizotumia kwa maandalizi yake hayo.

Simbu anaendelea kusema pamoja na kutokwenda na kocha wala daktari, anasisitiza kuzoea hali hiyo ya upweke, ambayo imemuondolea hofu na kujiona mwenye nguvu ya kufanya vizuri katika mbio hiyo keshoi.

Anasema tayari ameifuatilia njia watakayopita na kubaini sio ngumu sana na hata hali ya hewa siku hiyo haitakuwa ya joto kali, hivyo itamsaidia kupambana na kufanya vizuri.

CHANGAMOTO

Simbu anasema changamoto kubwa anayohisi kukumbana nayo wakati wa mbio hiyo ni kuwa peke yake wakati wanariadha wanchi nyingine kama Wakenya na Waganda watakuwa wengi, hivyo ni rahisi kumbana na kummaliza nguvu mapema.

Hatahivyo, anasema atapambana kwa nguvu kuhakikisha anapambana nao licha ya kuwa peke yake.