Kenya yatinga fainali Olympic ya vijana
DAKAR: TIMU ya raga ya wanawake ya Kenya chini ya miaka 18, Rising Lionesses, imefuzu hatua ya nusu fainali ya Michezo ya Olimpiki ya Vijana ya Dakar 2026 baada ya kuichapa Senegal mabao ya raga 19-0 katika mchezo wake wa pili wa Kundi A, ikiendeleza mwanzo mzuri wa mashindano hayo yanayofanyika nchini Senegal.
Kikosi hicho kinachoongozwa na nahodha Diana Wanjiku kimeonesha kiwango bora baada ya kuanza kampeni kwa ushindi wa 12-5 dhidi ya China kabla ya kupata ushindi mwingine mkubwa dhidi ya wenyeji Senegal. Ushindi huo wa pili mfululizo umeonesha uimara wa safu ya ulinzi ya Kenya, iliyofanikiwa kuzuia wapinzani wake kupata alama yoyote.
Katika mchezo wa kwanza dhidi ya China, Evalyne Afande na Micheal Mmboga walikuwa miongoni mwa wachezaji walioiwezesha Kenya kupata ushindi. Afande, ambaye amepitia shule ya Kinale Girls, mabingwa wa taifa wa raga ya shule, ameendelea kujitengenezea jina katika mashindano hayo ya kimataifa.
Kenya sasa inaelekeza nguvu zake katika mchezo wa mwisho wa Kundi A dhidi ya Australia utakaochezwa Jumanne saa 7:02 mchana kwa saa za Afrika Mashariki, ikiwa na lengo la kuendeleza rekodi yake nzuri.
Hata hivyo, katika mchezo wa Baseball5, timu mchanganyiko ya Kenya imekosa nafasi ya kucheza fainali ya kuwania medali ya dhahabu baada ya kufungwa seti 2-0 na Cuba katika hatua ya nusu fainali. Kipigo hicho kimehitimisha mwenendo wake mzuri wa kutopoteza mchezo katika hatua ya makundi, ambako ilikuwa imezishinda Ufaransa, Mexico na Syria na kufanikiwa kufuzu hatua ya nne bora.
Kwa matokeo hayo, Kenya sasa italazimika kupambana katika mchezo wa kuwania medali ya shaba ili kumaliza kampeni yake ya kwanza ya Baseball5 katika Michezo ya Olimpiki ya Vijana ikiwa na medali. Cuba, kwa upande wake, imefanikiwa kujihakikishia nafasi ya kuwania medali ya dhahabu baada ya kuizima safari ya Kenya katika hatua ya nusu fainali.
Katika mchezo wa Judo, safari ya mwanamichezo wa Kenya, Rael Kuloba, imefikia tamati baada ya kupoteza pambano lake la marudiano (repechage) dhidi ya Boubacar Ousamane wa Ivory Coast katika kituo cha Dakar Expo Centre. Kuloba alikuwa amepata nafasi nyingine ya kuendelea na mashindano baada ya kupoteza pambano lake la hatua ya 16 bora dhidi ya Viktoria Grigoryan, lakini alishindwa kutumia nafasi hiyo kufuzu hatua inayofuata.
Kuloba alianza vizuri pambano dhidi ya Ousamane na kupata alama 1-0, lakini baadaye alishindwa kulinda uongozi huo hadi mwisho. Mwanajudo huyo alisema mashindano hayo yamempa uzoefu muhimu, hasa baada ya kushiriki katika uzito mpya wa chini ya kilo 52, huku akipanga kuboresha kasi, muda wa kufanya mashambulizi na mbinu zake za mapambano kwa ajili ya mashindano yajayo.
Kocha wake, Johnson Kirimo, amemsifu kwa juhudi na maendeleo aliyoyaonesha, akieleza kuwa uzoefu wa Dakar utakuwa msingi muhimu katika safari yake ya kuimarika zaidi katika kundi hilo la uzito. Kwa ujumla, Dakar 2026 ni mashindano ya kihistoria kwa kuwa ni mara ya kwanza Michezo ya Olimpiki ya Vijana kufanyika katika ardhi ya Afrika, huku yakitarajiwa kuhitimishwa Novemba 13, 2026.
