Rotary yakusanya fedha za madawati 600
DAR ES SALAAM: KLABU ya Rotary ya Dar es Salaam imechangisha fedha kwa ajili ya upatikanaji wa madawati 600 kwa wanafunzi wa shule za msingi kupitia mashindano ya michezo ya Pickleball na Padel yaliyopewa jina la Serve & Smash 2026.
Mashindano hayo yalifanyika, katika eneo la Tanzanite Park, Mikocheni, jijini Dar es Salaam.
Tukio hilo la kuchangisha fedha lilikutanisha timu 73 na washiriki 147, wakiwemo wanachama wa Rotary, wadhamini kutoka sekta ya kampuni, wataalamu, familia na wadau mbalimbali wa jamii waliounganishwa na lengo la kuboresha mazingira ya kujifunzia kwa wanafunzi wa shule za msingi jijini Dar es Salaam.
Fedha zilizopatikana kupitia mashindano hayo zitachangia upatikanaji wa madawati 600 kupitia mpango wa ufadhili wa Rotary Global Grant, ikiwa ni sehemu ya mradi unaoendelea wa klabu hiyo wenye jina la Gift of Education Desks Project.
Akizungumza wakati wa tukio hilo, Rais wa Rotary Club of Dar es Salaam, Leenah Munyua, amesema mashindano hayo yanaonesha namna michezo inavyoweza kuwaunganisha watu katika kuunga mkono mipango yenye manufaa kwa maendeleo ya jamii.
“Serve & Smash inahusu mengi zaidi ya michezo. Inahusu kuwaunganisha watu kwa ajili ya kutimiza lengo lenye maana. Kila mchango uliotolewa kupitia mashindano haya unatukusogeza karibu zaidi na kuwapatia watoto wa shule kitu muhimu, yaani dawati linalofaa na mazingira yenye heshima kwa ajili ya kujifunzia,” amesema Munyua.
Ametoa pongezi kwa washiriki, wadhamini, washirika, watu waliojitolea na wanachama wa klabu hiyo kwa michango yao iliyowezesha mashindano hayo kufanikiwa.
Munyua amesema idadi kubwa ya waliojitokeza pamoja na michango kutoka kwa watu binafsi na washirika wa kampuni inaonesha umuhimu wa kushirikiana katika kutatua changamoto zinazoikabili jamii.
“Tunawashukuru kwa dhati wadhamini wetu, washiriki, watu waliojitolea, kamati ya maandalizi na kila mtu aliyechangia muda, rasilimali na nguvu zake ili kufanikisha tukio hili. Msaada wao utasaidia kuleta mabadiliko ya kudumu katika maisha ya watoto wa shule jijini Dar es Salaam,” ameongeza.
Mbali na kuchangisha fedha, mashindano hayo yalitoa fursa kwa wafanyabiashara, wataalamu na wanajamii kujenga mahusiano na mitandao ya ushirikiano huku wakiunga mkono mpango wa elimu unaolenga kuboresha mazingira ya madarasani.
Tangu kuanzishwa kwake mwaka 2020, mradi wa Gift of Education Desks Project wa Rotary Club of Dar es Salaam umetoa zaidi ya madawati 6,000 yenye thamani ya takribani shilingi milioni 600 za Tanzania, na kunufaisha wastani wa wanafunzi 15,000 katika shule mbalimbali jijini Dar es Salaam.
Mradi huo unalenga kuboresha mazingira ya kujifunzia kwa kuhakikisha wanafunzi wanapata madawati yanayofaa, hatua inayosaidia kujenga mazingira bora, yenye starehe na heshima kwa ajili ya elimu.
Kupitia mipango kama Serve & Smash, klabu hiyo inaendelea kuhamasisha watu binafsi, wafanyabiashara na taasisi mbalimbali kushiriki katika kuboresha fursa za elimu kwa watoto.
Mashindano ya mwaka 2026 yameonesha kuwa michezo inaweza kuwa na mchango mkubwa zaidi ya ushindani na burudani kwa kuwa jukwaa la ushiriki wa jamii, ushirikiano na kuleta matokeo chanya ya kudumu.
Rotary Club of Dar es Salaam ni sehemu ya Rotary International, mtandao wa kimataifa unaowaunganisha watu wenye dhamira ya kuhudumia jamii na kuleta mabadiliko chanya ya kudumu.
