Barcelona na matumaini lukuki Camp Nou
BARCELONA: MABINGWA watetezi wa LaLiga FC Barcelona wana kila sababu ya kusherehekea kurejea Camp Nou, lakini kocha wao Hansi Flick anasisitiza furaha yake itakamilika endapo watafungua uwanja wao uliokarabatiwa kwa ushindi watakapokaribisha Athletic Bilbao Jumamosi.
Vigogo hao wa Catalonia wanarejea katika makazi yao wakiwa nyuma ya Real Madrid kwa pointi tatu, baada ya mwanzo wa msimu ulioyumba na kutofanana na kiwango chao cha msimu uliopita walipotwaa treble ya ndani.
Msimu umeanza kwa kukatizwa mara kadhaa na mapumziko ya kimataifa, lakini sasa Flick ana nafasi ya kutulia na kutafuta suluhisho la changamoto zinazowakabili. Barcelona wamefungwa mabao 15 zaidi ya timu tisa kati ya 10 zilizo chini yao huku safu ya ushambuliaji pia ikikosa makali.
Hata hivyo, kurejea Camp Nou ni moja ya sababu zinazoongeza matumaini kwa klabu hiyo. Mara ya mwisho Barca kucheza nyumbani ilikuwa Mei 2023, kabla ya uwanja kufungwa kwa miaka miwili na nusu kwa ajili ya ukarabati. Walitarajia kuufungua tena Novemba 2024, lakini changamoto za ujenzi zikaleta kuchelewa, na timu kulazimika kucheza ugenini kwenye Uwanja wa Olimpiki.
“Kucheza pale (Camp Nou) kutatusaidia sana, na kwa mustakabali wa klabu ni jambo muhimu mno, nawapongeza wote walioufanyia kazi,” amesema Flick.
Katika mechi yao iliyopita, Barca waliibuka na ushindi wa 4-2 dhidi ya Celta Vigo Mjini Galicia, kipindi cha kwanza kilikosa utulivu uliorejea kipindi cha pili jambo ambalo Flick anaamini linatoa mwongozo wa namna wanavyopaswa kucheza.
Flick anatumai kuongezeka kwa imani kutasaidia timu kutekeleza kikamilifu mfumo wao wa safu ya juu ya ulinzi, kama walivyofanikiwa kwa muda mrefu msimu uliopita.
