Swahili Fashion Week yaja na sura mpya

DAR ES SALAAM: WIKI ya Mitindo ya Kiswahili (Swahili Fashion Week and Awards) imetangaza rasmi kuwa msimu wake wa 18 utafanyika kuanzia Desemba 5 hadi 7, 2025, katika Ukumbi wa Parthenon, jijini Dar es Salaam.

Jukwaa hilo lenye heshima kubwa katika tasnia ya mitindo barani Afrika linatarajiwa kuwakutanisha wabunifu zaidi ya 46 kutoka Tanzania, Kenya, Italia, Afrika Kusini, Trinidad & Tobago na mataifa mengine duniani.

Mwaka huu, Swahili Fashion Week inaashiria hatua muhimu ya mageuzi kwa uzinduzi wa nembo mpya, ishara ya mabadiliko, ubunifu na mwanzo wa enzi mpya ya kisanaa.

Akizungumza na Spoti Leo wakati wa uzinduzi wa nembo hiyo uliofanyika katika ukumbi wa Bravo, Coco Beach jijini Dar es Salaam, Mwanzilishi na Mkurugenzi wa Swahili Fashion Week and Awards, Mustafa Hassanali, alisema kauli mbiu ya mwaka huu inaangazia mchanganyiko wa mitindo na teknolojia, ikitoa fursa ya mjadala kuhusu namna wabunifu wa Kiafrika wanavyoweza kuendana na kasi ya mapinduzi ya kidijitali ili kuunda mitindo ya kesho.

“Kadri dunia inavyopitia mageuzi makubwa ya kiteknolojia, Swahili Fashion Week 2025 inalenga kuchochea wabunifu kutumia teknolojia kama chombo cha ubunifu endelevu, chenye athari chanya na kisichopoteza utambulisho wa Kiafrika,” amesema Hassanali.

Ameongeza kuwa kufikia mwaka 2024, zaidi ya asilimia 60 ya wateja wa mitindo barani Afrika walihusiana na chapa mbalimbali kupitia majukwaa ya kidijitali na mitandao ya kijamii, jambo linaloashiria zama mpya katika matumizi ya mitindo.

Hassanali alibainisha kuwa teknolojia zinazoibuka kama Artificial Intelligence (AI), uchapishaji wa 3D, Uhalisia Pepe (VR) na Uhalisia Ulioongezwa (AR) zimeanza kubadili tasnia ya mitindo duniani, huku wabunifu wa Kiafrika wakizidi kuzikumbatia kwa ubunifu wa kiafrika

Jukwaa hilo ni nguzo ya ubunifu wa kiafrika Tangu kuanzishwa kwake mwaka 2008, Swahili Fashion Week imeendelea kuwa nguzo ya ubunifu na uvumbuzi, ikitoa jukwaa kwa wabunifu kutoka nchi zinazozungumza Kiswahili na kwingineko kuonyesha kazi zao, kuungana na wadau wa tasnia na kufikia fursa za kimataifa.

Kwa miaka yote, tamasha hilo limechangia kukuza ubora wa ubunifu wa Kiafrika kwa kuunganisha urithi wa kitamaduni na uelewa wa kisasa, likisimulia simulizi la Afrika kupitia mtindo.

“Dira yetu imekuwa daima kuinua ubunifu wa Kiafrika hadi viwango vya kimataifa huku tukisherehekea utambulisho wetu wa kipekee wa kitamaduni. Kwa kuzindua nembo mpya na kukumbatia kauli mbiu ya Swahili Futurism, tunathibitisha tena imani yetu kwamba Afrika si tu chimbuko la utamaduni, bali pia ni mstari wa mbele wa ubunifu,” amesema Hassanali.

Kutolewa tuzo Swahili Fashion Week and Awards 2025 pia itatambua mafanikio ya kipekee katika tasnia ya mitindo kupitia vipengele 28 vya tuzo.
Mchakato wa upigaji kura utaendeshwa kwa uwazi na kampuni ya Nexia Tanzania, ili kuhakikisha uhalali na heshima kwa wale wanaotoa mchango mkubwa katika ukuaji wa mitindo ya Kiafrika.

Swahili Fashion Week ni tukio kubwa zaidi la mitindo katika Afrika Mashariki na Kati, likitoa jukwaa kwa wabunifu wa ndani na wa kimataifa kuonyesha ubunifu wao, kukuza kazi zao, na kuunganishwa na sekta ya kimataifa ya mitindo.

Ilianzishwa mwaka 2008 na mbunifu mashuhuri wa Afrika, Mustafa Hassanali, Swahili Fashion Week inasisitiza kwamba mitindo si tu sanaa, bali pia ni sekta muhimu ya ubunifu inayoweza kuchangia uchumi na kukuza chapa ya “Made in Africa.”