Vita ya kumgombea Bellingham

NYOTA wa Borussia Dortmund, Jude Bellingham anatarajiwa kuwa kitovu cha vuta nikute ya uhamisho msimu ujao.

Ripoti ya tovuti ya michezo ya The Athletic ya Marekani imesema Bellingham mwenye umri wa miaka 19 amekuwa kivutio kwa miamba ya soka duniani ya Liverpool, Real Madrid, Manchester City, Manchester United na Chelsea.

Nyota huyo wa kimataifa wa Uingereza anasemekana kuwa lengo kuu la Liverpool na kocha Jurgen Klopp lakini Manchested United pia ilikaribia kumsajili Bellingham kabla hajajiunga na Dortmund mwaka 2020.

Borussia Dortmund imesema Bellingham ana thamani ya Euro milioni 150 sawa na shilingi bilioni 344.77 huku ikiripotiwa kuwa klabu hiyo ina nia ya kumwongezea mkataba ili abaki Ujerumani.

Vita hiyo ya kumgombea Bellingham inakumbusha habari ya aina hiyo iliyowahi kutokea miaka iliyopita kwa Jadon Sancho na Erling Haaland lakini sasa ni zamu ya Bellingham.