Ogana atangazwa kuwa balozi mpya Kenya Police
KENYA: Katika hatua ya kihistoria, Klabu ya Soka ya Kenya Police imemtangaza rasmi muigizaji maarufu na mtu wa umaarufu, Brian Ogana, maarufu kama ‘Luwi’ kuwa balozi mpya wa klabu hiyo.
Akizungumza na Spoti leo kwa njia ya simu Luwi, amesema Ubalozi huo umekuja wakati muafaka, huku klabu hiyo ikisherehekea ubingwa wake wa Ligi Kuu ya Kenya (KPL) kwa mwaka 2025.
Brian Ogana, anayefahamika kwa ushawishi wake mkubwa katika jamii na mchango wake katika sanaa na maendeleo ya vijana, sasa atakuwa uso mpya wa klabu hiyo.
Uongozi wa Kenya Police FC umeeleza kuwa uteuzi wa Ogana ni sehemu ya mkakati wa kukuza hadhi ya klabu kitaifa na kimataifa, sambamba na kuimarisha uhusiano na mashabiki.
“Tunafurahia kumkaribisha Brian Ogana katika familia ya Kenya Police FC. Ana dira, msukumo na mvuto wa kipekee unaoendana na maono yetu ya kuhamasisha vijana na kukuza vipaji,” imesema taarifa kutoka kwa uongozi wa klabu hiyo.
Kupitia nafasi hii, Ogana anatarajiwa kuhamasisha mashabiki wapya, kuwavutia wadhamini, na kusaidia kupanua ushawishi wa klabu nje na ndani ya uwanja.
“Uhusiano huu mpya unaleta matumaini mapya kwa mustakabali wa klabu hiyo, hususan baada ya msimu wa mafanikio makubwa.
Kenya Police FC imejidhihirisha kama nguzo imara katika soka la Kenya, na kwa ushirikiano na Ogana, taswira ya klabu hiyo inatarajiwa kung’ara zaidi.
