Maguire agoma kutoa hongo

ATHENS: MLINZI wa timu ya taifa ya England na Manchester United, Harry Maguire, amekataa kutoa hongo ya Pauni 43,500 kwa polisi wa Ugiriki ili kesi yake ya shambulio iishe, siku chache kabla ya kutolewa hukumu ya miezi 15 iliyosimamishwa.

Maguire, 33, alikutwa na hatia ya shambulio dogo, baada ya kupigana akiwa likizo ya kifamilia Agosti 2020. Tukio hili lilitokea kwenye kisiwa cha Mykonos, Ugiriki, kisiwa kinachojulikana duniani kote kwa fukwe zake nzuri, nyumba nyeupe za kipekee, na maisha ya usiku yenye burudani na sherehe.

Mlinzi huyo anatarajia kuwasilisha rufaa katika Mahakama Kuu ya Ugiriki baada ya hakimu mmoja kumtangaza hakuwa na hatia, huku majaji wawili wengine wakitoa hukumu ya hatia.

Maguire hakuhudhuria kesi  kwenye kisiwa cha Syros, kwani alikuwa akijiandaa kwa mchezo wa timu yake dhidi ya Newcastle United usiku wa Jumatano.

Awali, Maguire alikamatwa na kupewa hukumu ya miezi 21, mwaka 2020 kutokana na shambulio, lakini hukumu hiyo ilifutwa baada ya rufaa chini ya sheria za Ugiriki.

Kesi  iliahirishwa mara nne, mara ya kwanza Mei 2023 kwa sababu wakili wa utetezi hakuwa na muda, kisha Februari 2024 kutokana na mgomo wa mawakili wa Ugiriki, Machi na Oktoba mwaka jana.

Kwa mujibu wa Daily Mail, Maguire ametoa kauli kuhusu tukio hilo akisema: “Ilikuwa ya kutisha. Sio kitu ambacho ningependa kufanya tena. Hii ilikuwa mara yangu ya kwanza ndani ya gereza, na sitaki mtu yeyote apitie hilo. Sihisi kuwa ninapaswa kuomba radhi kwa mtu yeyote. Radhi ni pale unapofanya makosa.

Je, najuta kuwa nilikuwepo katika hali hiyo? Bila shaka, hali hiyo imekuwa ngumu, na ninachezea moja ya klabu kubwa duniani, hivyo najuta kuwaletea mashabiki na klabu changamoto.

Nina imani kubwa katika sheria za Ugiriki. Kesi ya upya itatupa muda zaidi wa kukusanya ushahidi, kuwaruhusu mashahidi kuja kortini, na nina uhakika kwamba ukweli utaonekana na kutolewa.”
Licha ya hayo yote, alicheza dakika 90 katika mchezo wa Manchester United dhidi ya Newcastle, ambapo timu yake ilipoteza 2-1 na kupoteza nafasi mbele ya kiongozi wa ligi, Arsenal.