Gattuso hana presha na Kombe la Dunia 2026

MILAN: KOCHA wa timu ya taifa ya Italia, Gennaro Gattuso, amesema timu yake inatarajia mechi gumu dhidi ya Ireland Kaskazini mwezi Machi kwenye nusu fainali ya Playoff ya kufuzu Kombe la Dunia la mwakani.

Italia, mabingwa wa dunia mara nne, wanapigania kurejea katika fainali hizo kwa mara ya kwanza tangu 2014 baada ya kukosa michuano miwili mfululizo Urusi 2018 na Qatar 2022 kufuatia kupoteza mechi za Playoff.

Ikiwa Italia itawatoa Ireland Kaskazini, itakutana na mshindi kati ya Wales au Bosnia & Herzegovina kwenye fainali ya mchujo kuamua tiketi ya kwenda kushiriki fainali za Kombe la Dunia zitakazofanyika Amerika Kaskazini.

Akizungumza na Sky Sports Italia mara baada ya droo iliyofanyika jana Alhamisi, Gattuso amesema: “Ireland Kaskazini ni timu ya nguvu na haitoi nafasi. Tunatakiwa kucheza kwa umakini. Tumekuwa tukijua kwa miezi mitatu kwamba njia yetu ni kupitia Playoff. Tunaangalia mbele kwa kujiamini.”

Italia ilimfukuza kocha wa zamani, Luciano Spalletti, mwezi Juni. Ingawa Gattuso alianza kwa ushindi dhidi ya Estonia, Israel na Moldova katika mechi zake tano za mwanzo, bado hawakuweza kupata tiketi ya moja kwa moja. Walikumbana na kichapo cha 4-1 dhidi ya Norway katika mechi yao ya mwisho ya kufuzu.

Gattuso aliongeza kuwa timu yake lazima iboreshe udhaifu ulioonekana awali: “Tukifanya mambo sahihi tuna ushindani, lakini hatuwezi kufanya makosa kama tuliyofanya juzi. Hili ndilo jukumu langu kuu kuimarisha eneo hilo.”

Kombe la Dunia la 2026 litafanyika kuanzia Juni 11 hadi Julai 19 nchini Marekani, Canada na Mexico.