Akothee atoa sababu baba wa binti yake kutohudhuria harusi
UFARANSA:SIKU chache baada ya binti wa msanii maarufu wa Kenya, Akothee, Fancy Makadia kuolewa na raia wa Benin chini ya sheria ya Ufaransa, maswali yameibuka kuhusu kutokuwepo kwa baba mzazi wa binti huyo, Jared Okello, wakati wa ndoa hiyo.
Utiaji saini wa ndoa hiyo ulifanyika Machi 22 na ulihudhuriwa na familia na marafiki wa karibu, wakiwemo Akothee, baba mlezi wa Fancy, Dominic, na kaka zake wawili, Oyoo na Ojwang.
Akothee hakujibu moja kwa moja kuhusu lawama hizo, lakini alitumia mitandao ya kijamii kutoa ujumbe mzito kwa wanawake wasioishi na wanaume, akiwashauri wasiruhusu uchungu kuathiri uhusiano wa watoto wao na baba zao, na pia wasikilize maoni ya watoto wao.
“Kila jambo chungu utakalomwambia mtoto wako kuhusu baba yake hatimaye litaakisi tabia yake kadiri anavyokua. Ukipandikiza mawazoni mwao kwamba wamekataliwa, unatengeneza mtoto ambaye atabeba maumivu hayo milele,” alisema Akothee.
“Waruhusu watoto wako wajifunze wenyewe ikiwa baba yao anapendezwa na maisha yao au la. Si jukumu lako kuwajulisha, wataligundua kwa wakati wao wenyewe,” aliongeza.
Licha ya uvumi unaoendelea, Akothee anatazamia sherehe kubwa zaidi ya harusi ambayo Fancy na mumewe wanapanga. Mashabiki sasa wanajiuliza kama Jared Okello atajitokeza wakati huu.
Akothee na Jared Okello walioana miaka mitano kabla ya talaka yao rasmi mwaka 2011, wana mabinti watatu: Vesha Okello, Rue Baby, na Fancy Makadia. Baada ya kutengana, Akothee aliendelea na mpenzi wake Dominic, na kupata mtoto mwingine, Oyoo, ambaye alimlea Fancy.
