Dicaprio atoa Dola milioni 7 kusaidia uhifadhi wa Bahari
HOLLYWOOD: MWIGIZAJI maarufu wa filamu za Hollywood, Leonardo DiCaprio, aliahidi kutoa dola za Marekani milioni saba kwa ajili ya kusaidia miradi ya uhifadhi wa bahari duniani, akionesha dhamira yake ya kulinda mazingira na viumbe vya majini.
DiCaprio alitoa ahadi hiyo, wakati wa mkutano wa kimataifa wa Our Ocean uliofanyika katika Wizara ya Mambo ya Nje ya Marekani mjini Washington, D.C. Fedha hizo zilipangwa kutolewa kupitia taasisi yake ya Leonardo DiCaprio Foundation katika kipindi cha miaka miwili.
Muigizaji huyo alisema bahari zinakabiliwa na vitisho mbalimbali, ikiwemo mabadiliko ya tabianchi, uvuvi haramu na shughuli za binadamu zinazoharibu mazingira ya viumbe vya majini. Alisisitiza kuwa juhudi za kulinda bahari ni muhimu kwa maisha ya sasa na vizazi vijavyo.
DiCaprio pia alieleza kuwa uzoefu wake wa kupiga mbizi katika maeneo mbalimbali duniani ulimwezesha kushuhudia madhara ya uharibifu wa mazingira, ikiwemo matumbawe kubadilika rangi na maeneo ya bahari kupoteza uhai wa viumbe kutokana na athari za mazingira.
Mwaka 2015, taarifa ya Wizara ya Mambo ya Nje ya Marekani ilieleza kuwa taasisi ya DiCaprio ilikuwa imetoa zaidi ya dola milioni nne kwa miradi mipya ya uhifadhi wa bahari duniani. Miradi hiyo ilihusisha juhudi za kuanzisha maeneo makubwa ya bahari yaliyolindwa katika Pasifiki ya Kusini, Bahari ya Hindi na maeneo ya mbali ya Aktiki na Antaktika.
Mbali na kusaidia kuanzisha maeneo ya hifadhi, fedha hizo zililenga pia kuunga mkono juhudi za kukabiliana na biashara ya papa walio hatarini na uvuvi uliopitiliza, pamoja na kusaidia jamii za maeneo ya pwani kulinda rasilimali zao za baharini.
Hatua hiyo iliimarisha nafasi ya DiCaprio kama mmoja wa watu mashuhuri wanaotumia umaarufu na rasilimali zao kuhamasisha utunzaji wa mazingira. Kupitia ahadi hiyo na miradi mingine ya taasisi yake, mwigizaji huyo alisisitiza umuhimu wa ushirikiano wa kimataifa katika kulinda bahari na viumbe vinavyoitegemea.
