Maafisa Michezo, Utamaduni watakiwa kutambua hifadhi za utamaduni
DAR ES SALAAM:MAOFISA michezo na utamaduni wa vijiji, kata, tarafa, halmashauri na mikoa wametakiwa kubaini, kutambua na kuweka mikakati ya kuhifadhi utamaduni wa mambo ya kale ili kurithisha vizazi vijavyo.
Kauli hiyo imetolewa na Ofisa Michezo kutoka Ofisi ya Rais Tawala za Mikoa na Serikali za Mitaa TAMISEMI, George Jackson wakati walipotembelea Makumbusho ya Taifa wakiwa katika ziara ya mafunzo kwa maofisa wa Utamaduni na Michezo iliyofanyika leo jijini Dar es Salaam.
Amesema kuwa jamii imara ni ile inayofahamu historia yake kuanzia ilikotoka hadi ilipo sasa.
“Naishukuru serikali ya awamu ya sita chini ya uongozi wa Rais Dk Samia Suluhu Hassan kwa kuanzisha kitengo cha utamaduni, sanaa na michezo kwani kitengo hicho kimeimarisha uwezo wa mamlaka, hasa katika ngazi ya halmashauri, kusimamia kwa ukaribu masuala hayo ikiwa ni pamoja na bajeti za utekelezaji na upatikanaji wa wataalamu wa sekta hizo,”amesema.
Kwa upande wake, Mhifadhi Historia kutoka Makumbusho ya Taifa, Shomari Rajab, amesema kuwa ndani ya makumbusho hayo kuna vitu vingi vya kuvutia watalii, ikiwemo magari ya kihistoria, ukumbi wa kihistoria, na fedha za zamani ambapo amewasihi wananchi kuendelea kutembelea Makumbusho ya Taifa ili kupata maarifa kuhusu historia mbalimbali za kale.
Naye Ofisa Utamaduni wa Mkoa wa Lindi, Wilaya ya Nachingwea, Muhsidini Izza, amesema kuwa wao kama Maofisa wa Utamaduni katika ngazi ya wilaya, wana jukumu kubwa la kuendeleza, kutunza, na kuibua mambo mbalimbali yanayoakisi alama na urithi wa Taifa kwa ujumla.
