TOUCHROAD MR UK 2023>Marathon ya kutangaza vivutio vya utalii nchini
MSIMU wa tatu wa TouchRoad Mr Uk Marathon 2023 utafanyika Septemba 24 huku lengo kubwa likiwa ni kutangaza vivutio vya utalii hapa nchini.
Mbio hii pamoja na uchanga wake, lakini imekuwa na mikakati kabambe ya kutangaza vivutio vya utalii hapa nchini ili kuwezesha watalii wengi kutoka nje ya nchi, hasa China kutembelea nchini.
Kwa mujibu wa mratibu wa mbio hizo Nelson Mrashani, zaidi ya watalii 200 kutoka nchini China na nchi nyingine za Asia watashiriki na baadaye kutembelea vivutio mbalimbali
zikiwemo mbuga za wanyama na mambo mengine.
KUTANGAZA UTALII
Mrashani anasisitiza kuwa lengo la kuandaa mbio ni kumsaidia Rais Samia Suluhu Hassan kuifanya sekta ya utalii kuwa chanzo kikubwa cha mapato ya nchi.
Na tayari Mr Uk ambao awali walikuwa wakiandaa wenyewe mbio hizo, sasa wanashirikiana na kampuni kubwa ya China ya ToucRoad kuziandaa na kuwa na uhakika kushirikisha Wachina wengi.
Mbali na kuhamasisha watalii kutoka nje, mbio hizo pia zimekuwa zikihamasisha Watanzania kufanya utalii wa ndani kwa kutembelea vivutio mbalimbali vya utalii vilivyopo hapa nchini.
Tayari baadhi ya taasisi zimejitokeza kuwaunga mkono kama SGR, Bonite Bottler, TMC, Emergency Plus Medical Service, Zara Tanzania Adventures, Peracock, Clouds na ToucRoad
International.
SERIKALI
Mrashani anaipongeza na kuishukuru Serikali kupitia wizara zake za Utamaduni, Sanaa na Michezo pamoja na ile ya Maliasili na Utalii kwa kuwa mstari wa mbele kuhakikisha jambo lao hilo linafanikiwa.
Pia alizishukuru Wizara ya Mambo ya Ndani ya Nchi, Ujenzi na Uchukuzi na taasisi zote ambazo kwa njia moja au nyingine zinahusika katika maandalizi ya mbio hizo ambazo ni za kila mwaka.
Mrashani anasema kuwa serikali imekuwa mstari wa mbele kuhakikisha maandalizi ya mbio hizo yanakwenda vizuri na washiriki kutoka nje hawapati vikwazo vyovyote wakati wa kuingia nchini na wakati wote watakapokuwa nchini.
Mrashani anasema mbio hiyo yenye lengo la kukimbia kwa ajili ya kuimarisha utalii pamoja na uhusiano wa kimataifa, tayari dirisha la usajili limefunguliwa katika mifumo mbalimbali,
ikiwemo ile ya simu.
Anasema kuwa ni matarajio yake kuwa wanariadha wengi watajisajili mapema ili kukwepa usumbufu wa kufanya hivyo dakika za mwisho na kusababisha usumbufu usio wa lazima.
Anasema mbio hizo za kimataifa, ambazo zitashirikisha mbio za kilometa 21, 10 na tano zinatarajia kuwa na zawadi nono ambazo zitatangazwa hivi karibuni.
MAANDALIZI
Akizungumzia maandalizi, Mrashani anasema yanaendelea vizuri na wanatarajia mbio hizo kuendeshwa kwa kiwango cha kimataifa kuanzia usimamizi wake ikiwa pamoja na usalama, ambapo kutakuwa na vifaa vya kielektroniki vya kuanzisha na kumalizia mbio.
“Katika mbio zetu hakutakuwa na watu wa kuwashika washindi mikono ili kujua nani amemaliza wa ngapi kama zilivyo mbio nyingi hapa nchini, sisi tutakuwa na mashine maalumu itakayojua nani amemaliza katika nafasi gani.”
Pia anasema kuwa kutakuwa na gari maalumu ambalo litakuwa likionesha muda wa mbio hizo, hivyo wanariadha watajua wamekimbia kwa muda gani na wamebakisha muda na
umbali gani kabla ya kuhitimisha mbio.
Pia siku ya mbio kutakuwa na maonesho ya bidhaa mbalimbali katika viwanja vya Leaders Kinondoni, Dar es Salaam kuanzia yale ya utalii, madini, afya, elimu na burudani kutoka vikundi mbalimbali kwa ajili ya kutangaza bidhaa zao.
