Ngwando: “Mikono Itaongea Siku Ya Boxing Day”

DAR ES SALAAM: BONDIA Ally Ngwando amesema hana haja ya maneno mengi kuelekea pambano lake na Mussa Makuka litakalopigwa Desemba 26, akisisitiza kuwa Watanzania wanaufahamu uwezo wake ulingoni.

Akizungumza na waandishi wa habari, Ngwando alisema muda wa maneno umekwisha na kwamba kazi yake itaonekana siku ya pambano.

“Sina maneno mengi kwa sababu Watanzania wanaijua kazi yangu. Mikono itaongea siku hiyo, natamani hata siku ifike kesho nije nioneshe sanaa yangu niliyonayo,” alisema Ngwando.

Akimuelekea mpinzani wake, Ngwando alisema:“Makuka kazi unayo, huyu ni mdomo tu kuongea. Akipanga kuwaonesha Watanzania basi ajipange kweli. Afanye mazoezi vizuri, kazi anayo.”

Ngwando na Makuka wanatarajiwa kuvuta hisia za mashabiki wa ngumi katika pambano hilo la Boxing Day, ambalo tayari limeanza kutengeneza hamasa kubwa kwa mashabiki na wadau wa mchezo huo.

Hilo litakuwa ni miongoni mwa mapambano ya utangulizi ya kumsindikiza Hassan Mwakinyo ambaye atapambana na bondia kutoka nje.