Historia ya MC Pilipili (Kuishi kwake hadi umauti ulipomkuta) 1985-2025

Maandiko yanasema kuishi ni Kristo kufa ni faida

MNAMO tarehe 1 Oktoba 1985, katika ardhi ya Mkoa wa Dodoma, alizaliwa mtoto wa pili wa Mathias na Mariam Matebe, aliyepewa jina Emmanuel Mathias baadaye akaja kufahamika na wananchi wengi kama MC Pilipili, mmoja wa washehereshaji na wacheshi maarufu nchini Tanzania.

Kipai na maisha yake ya utotoni Tangu akiwa mtoto, Emmanuel alionesha kuwa na vipaji vingi na vya kipekee. Alikuwa mcheshi, mchangamfu, na mwenye uwezo wa kufanya watu wafurahi.

Alipenda uchoraji, uimbaji, kucheza muziki, na mara nyingi alitamani kuwa mwandishi wa habari au hata mchungaji.

Moja ya vipaji vyake vilivyojitokeza mapema ilikuwa uwezo wake wa kuiga sauti za watu maarufu, kubadili nyimbo za muziki wa kizazi kipya, na kuchekesha wale waliomzunguka.

Hata katika umri mdogo, kipaji chake kilitambuliwa na kanisa la Baptist Bible Church, na akatunukiwa cheti cha “Mtoto wa Nuru” kutokana na kuangaza na kuleta furaha kwa wengine.

Safari ya kielimu na taaluma akiwa sekondari, mwalimu mmoja alitambua kipaji chake cha Theatre Arts sanaa ya jukwaani na kumshawishi achague somo hilo.

Hapo ndipo safari yake rasmi ya ucheshi na ushereheshaji ilipoanza. Alianza kufanya matukio madogo kama birthday, harusi, na vipaimara, na taratibu jina lake lilianza kung’ara.

Baada ya kuhitimu mafunzo ya ualimu mwaka 2009, Pilipili alikumbana na kipindi kigumu baada ya kufiwa na babake, jukumu la kuiendeleza familia likiwa mikononi mwake.

Hata hivyo, hakukatishwa tamaa. Aliamua kutumia kipaji chake kuwa chanzo cha kipato, na hatua hiyo ikageuka kuwa mwanzo wa mafanikio makubwa.

Kupanda kwa umaarufu Kutoka kwenye matukio ya mikoani Dodoma hadi jijini Dar es Salaam, na baadaye Kenya, Uganda, Rwanda na Afrika Kusini, MC Pilipili alijijengea jina kama mshehereshaji mwenye upekee na mvuto wa kipekee.

Umahiri wake ulimfikisha kwenye majukwaa ya Bungeni, kwenye makanisa makubwa, na katika majukwaa ya kimataifa.

Alikuwa akisema, “Sherehe ni MC,” lakini maisha yake yalikuwa zaidi ya sherehe: yalikuwa safari ya kupanda na kushuka, bidii, na moyo wa kueneza furaha.

Alikuwa mfano wa msanii anayejitengenezea nafasi yake kupitia ubunifu, unyenyekevu na kuwatia moyo wengine.

Maisha na familia MC Pilipili alifunga ndoa mnamo June 29, 2019 na mpendwa wake Phinomena, maarufu kama Cute Mena, na wawili hao walibarikiwa kupata mtoto mmoja, aliyeongeza thamani na furaha katika maisha yao.

Umauti na hatua ya mwisho ya safari Mnamo Jumapili, Novemba 16, 2025, mshumaa wake ulizimika mkoani Dodoma, mahali aliponzaliwa na alipolipenda sana. Alifariki akiwa anaenda kutekeleza kazi aliyopenda zaidi kusherehesha sherehe ya harusi.

Kifo chake kiliacha simanzi kubwa kwa familia, mashabiki, wasanii wenzake, na jamii kwa ujumla.

Urithi wake Leo tunamkumbuka MC Pilipili (Emmanuel Mathias) si tu kama mchekeshaji au mshehereshaji, bali kama nembo ya matumaini, furaha, bidii na uthubutu.

Alikuwa sauti ambayo ilifanya watu watabasamu, moyo uliogusa maisha ya wengi, na mfano kwa vijana kwamba kipaji kinaweza kubadilisha maisha.

Urithi wake utaendelea kuishi kupitia kicheko, kumbukumbu, na mioyo ya wote walioguswa na kazi zake.

Katika safari ya maisha ya MC Pilipili, tulishuhudia nguvu ya tabasamu na uwezo wa kipaji kubadilisha maisha. Alikuwa zaidi ya mshehereshaji; alikuwa dawa ya huzuni, rafiki wa kila mtu, na amani kwa waliovunjika moyo.

Kupitia ucheshi wake, alifundisha dunia kuwa furaha si jambo la kifahari bali ni baraka ya kugawana.

Ingawa mwili wake umetutoka, mwanga wake umebaki. Kila kicheko alichokipanda kimekuwa kumbukumbu isiyofutika mioyoni mwetu.

Urithi wake ni kielelezo cha kwamba maisha yanapimwa si kwa muda uliotolewa duniani, bali kwa athari uliyoacha kwa watu.

MC Pilipili ameondoka, lakini alituachia sababu elfu za kuendelea kutabasamu.

vita umevipiga Imani umeilinda mwendo umeumaliza Bwana ametoa bwana ametwa jina lake liimidiwe.