Denver Nuggets kama Yanga tu

MABINGWA wapya wa ligi ya mpira wa kikapu nchini Marekani Denver Nuggets wamefanya sherehe kubwa za ubingwa waliotwaa msimu huu.

Nuggets walitembea katika mitaa mbalimbali ya mji wa Denver, Colorado wakishangalia ubingwa huo ambapo walipokelewa na maelfu ya mashabiki waliokuwa wamezama kwenye kilele cha furaha.

Denver Nuggets waliisambaratisha Miami Heat baada ya kuibuka na ushindi wa jumla 4-1 na kutwaa ubingwa wao wa kwanza NBA katika historia ya timu hiyo.

Kwa sasa mtindo huo maalumu wa kushangilia mafanikio ya msimu (PARADE) unafanyika kila kona Ulimwenguni ambapo siku za hivi karibuni mabingwa wa ligi ya mabingwa barani Ulaya Manchester City walifanya hivyo na nchini Tanzania Yanga walifanya pia sherehe za mafanikio yao kwa mtindo huo.