Czech yamfuta kazi Kocha Ivan Hašek
PRAGUE: Chama cha Soka cha Czech kimemfuta kazi kocha Ivan Hašek mapema leo Jumatano, kufuatia kichapo cha aibu cha mabao 2-1 katika mchezo wa kufuzu Kombe la Dunia 2026 dhidi ya Visiwa vya Faroe uliopigwa ugenini katika uwanja Tórsvøllur.
Haijabainika mara moja ni nani atakayechukua mikoba ya Hašek, lakini Rais wa Shirikisho la Soka la Czech, David Trunda, amesema kocha wa muda atatangazwa hivi karibuni kuiongoza timu hadi mwisho wa kampeni za kufuzu. Baada ya hapo, kocha wa kigeni huenda akateuliwa rasmi kwa nafasi ya kudumu.
Kwa sasa, aliyekuwa nyota wa zamani wa timu hiyo ya taifa ya Czech, Pavel Nedvěd, amepewa jukumu la kuandaa orodha ya majina ya makocha wanaoweza kuchukua nafasi hiyo.
Kipigo hicho cha Jumapili iliyopita kutoka kwa Faroe Islands taifa dogo lenye wakazi takribani 55,000 pekee kimeelezwa kuwa moja ya maafa makubwa zaidi katika historia ya soka la Czech, tangu walipopoteza kwa bao 1–0 dhidi ya Luxembourg katika mechi za kufuzu kwa michuano ya Euro miaka 20 iliyopita. Hata hivyo, wakati huo waliweza kufuzu kucheza fainali zilizofanyika England.
Licha ya kipigo hicho, matumaini ya Czech kufuzu kwa Kombe la Dunia la 2026 bado hayajazimika. Wanahitaji ushindi katika mechi yao ya mwisho dhidi ya Gibraltar Novemba 17 ili kumaliza katika nafasi ya pili kwenye Kundi L na kupata nafasi ya kucheza Playoff ya kufuzu
Chini ya Hašek, timu hiyo waliondolewa katika hatua ya makundi ya Euro 2024, lakini walifanya vyema katika UEFA Nations League, wakishinda kundi lao na kupanda daraja hadi Ligue A mwaka huo huo.
