Flick athibitisha Raphinha na De Jong Kurejea Barcelona
BARCELONA: KOCHA wa Barcelona, Hansi Flick, amethibitisha kuwa nyota wake Raphinha na Frenkie de Jong wamepona majeraha na wanaweza kucheza dhidi ya Real Betis katika mchezo wa La Liga utakaopigwa leo.
Barcelona inaingia katika mchezo huo ikiwa na rekodi ya ushindi wa asilimia 100 katika mashindano yote msimu huu, huku ikitarajia kuendeleza mwenendo huo mzuri.
Hata hivyo, kikosi hicho kinakabiliwa na mtihani mgumu dhidi ya Real Betis, ambayo inashika nafasi ya tatu kwenye msimamo wa La Liga.
Akizungumza na waandishi wa habari Ijumaa, Flick alieleza kuwa kurejea kwa wachezaji hao wawili ni habari njema kwa timu yake kabla ya mchezo huo muhimu mjini Seville.
Raphinha ni miongoni mwa wachezaji muhimu katika safu ya ushambuliaji ya Barcelona, kutokana na mchango wake katika kutengeneza nafasi na kufunga mabao.
Kwa upande wake, Frenkie de Jong ni kiungo muhimu anayesaidia kuunganisha safu ya ulinzi na ushambuliaji, huku akichangia katika umiliki na usambazaji wa mpira.
Kurejea kwa Raphinha na De Jong kunampa Flick chaguo zaidi katika kikosi chake, wakati Barcelona ikijiandaa kukabiliana na Real Betis katika harakati za kuendeleza rekodi yake nzuri ya msimu huu.
