Antonelli awa bingwa mdogo zaidi wa dunia Formula One
MEXICO: MWENDESHA magari wa Mercedes, Kimi Antonelli, ameandika historia katika mashindano ya Formula One baada ya kutwaa ubingwa wa dunia akiwa na umri wa miaka 20 na siku 68, na kuwa bingwa mwenye umri mdogo zaidi kuwahi kutokea.
Antonelli alihakikisha anapata taji hilo baada ya kumaliza katika nafasi ya tatu kwenye mashindano ya Mexican Grand Prix yaliyofanyika Novemba 1, 2026, katika uwanja wa Hermanos Rodriguez, Mexico City.
Ingawa Max Verstappen wa Red Bull alishinda mbio hizo, matokeo ya Antonelli yalitosha kumhakikishia ubingwa huo, akiwa mbele ya wapinzani wake katika msimamo wa jumla wa mashindano.
Kwa mafanikio hayo, Mwitaliano huyo ameivunja rekodi ya Sebastian Vettel, aliyekuwa bingwa mwaka 2010 akiwa na umri wa miaka 23, na kuwa Mwitaliano wa kwanza kutwaa taji hilo tangu Alberto Ascari alipofanya hivyo mwaka 1953.
Akizungumza baada ya ushindi huo wa kihistoria, Antonelli alisema amefanikisha ndoto hiyo kutokana na mchango wa timu ya Mercedes na familia yake, akieleza kuwa anashukuru kwa mafanikio aliyoyapata katika msimu huu.
Alisema msimu huo umekuwa wa kipekee kwake, akibainisha kuwa kushiriki jukwaa la washindi pamoja na Verstappen na Lewis Hamilton ni jambo kubwa, huku akitarajia kupata ushindani zaidi katika misimu ijayo.
Mashindano hayo yalisimamishwa kwa muda baada ya mizunguko 46 kati ya 71 kufuatia ajali ya dereva wa Cadillac, Valtteri Bottas, ambaye gari lake lilipata hitilafu katika mfumo wa kusimamisha gurudumu la mbele kushoto na kugonga vizuizi vya pembeni ya uwanja. Bottas alitoka salama, huku Antonelli akiendelea na mbio hizo baada ya kurejea kwa mashindano na kuhakikisha anamaliza katika nafasi ya tatu na kutwaa ubingwa.
