Phina aeleza maana mpya ya wimbo wa wawili

DAR ES SALAAM: MSANII wa Bongo Fleva, Saraphina Michael maarufu kama Phina, amesema kuwa wimbo wake “Wawili” sasa una maana ya kipekee na ya kweli katika maisha yake ya mapenzi, baada ya kuuhusisha moja kwa moja na mpenzi wake, Eni Edo, raia wa Nigeria.

Wimbo huo wa “Wawili” uliotoka rasmi Februari 16, 2024, uliwasilisha simulizi ya mapenzi ya watu wawili yanayojengwa juu ya misingi ya uaminifu, maombi na kujitolea, bila nafasi ya mtu wa tatu.

Katika wimbo huo, Phina aliimba kwa hisia kali akisema:

“Nilimuomba Mungu anipe wa kufanana naye, kanipa wewe wa kwangu mwenyewe.”

Maneno hayo, wakati huo, yalitafsiriwa kama maudhui ya kisanii yanayoakisi mapenzi ya ndoto au hisia za msanii.

Hata hivyo, miaka miwili baadaye, wimbo huo umeibuka tena katika mjadala wa mashabiki baada ya Phina kuutumia kama sauti ya picha aliyoiweka kwenye mitandao ya kijamii akiwa na mpenzi wake, Eni Edo.

Kilichozua gumzo zaidi ni kauli aliyoiandika kwenye picha hiyo:

“Wimbo wangu sasa unaleta maana.”

Kauli hiyo imechukuliwa na wengi kama uthibitisho kuwa maudhui ya wimbo “Wawili” sasa yanaakisi kile ambacho Phina anakipitia katika maisha yake halisi ya mapenzi.

Iwe wimbo huo uliandikwa kwa msukumo wa kisanii au kutokana na uzoefu binafsi, ni dhahiri kuwa safari ya muda imeufanya upate tafsiri mpya, nzito na ya kihisia zaidi.

Kwa sasa, “Wawili” hauonekani tena kama wimbo wa kawaida wa mapenzi, bali ni simulizi linalothibitisha kuwa wakati mwingine sanaa hutangulia maisha, kisha maisha huja kuthibitisha sanaa.